18 июля 2008 г.
Çамрăк армеецсен çарпа спорт вăййисене кашни çулах ирттереççĕ. Пирĕн районта вăл кăçал çу уйăхĕн вĕçĕнче Тĕмер ял тăрăхĕн территорийĕнче пулни пирки пĕлтернĕччĕ. Унăн çĕнтерÿçисем – Тăвай шкулĕн вĕренекенĕсем – июнĕн 28-мĕшĕнчен пуçласа июлĕн 1-мĕшчен район чысне республикăра хÿтĕлерĕç.
Çамрăк армеецсен вăййисене кăçал Сĕнтĕрвăрри районĕнче йĕркелерĕç. Ăмăртăва хутшăнакансен лагерĕ анлă Атăл хĕрринче вырнаçрĕ. 4 кун хушши тупăшрĕç яшсемпе хĕрсем. Программăри конкурссене 9 блока пĕрлештернĕ. Теори пайĕнчи историпе патриотизм темисемпе çыхăннă ыйтусене компьютерпа усă курса пурнăçларĕç çамрăксем. Çарпа истори блокĕнче Тăвай шкулĕн аслă ушкăнĕ çĕнтерчĕ, кĕçĕннисем 2-мĕш вырăн йышăнчĕç.
2-мĕш кун вара финалри вăйăсене уçнипе пуçланчĕ. Пухăннисене Чăваш Республикин вĕрентÿ тата çамрăксен политикин министрĕ Г.Чернова, ЧР çамрăк армеецсен юхăмĕн председателĕ А.Золотов, Раççей геройĕ Е.Борисов, ЧР çар комиссарĕ А.Мокрушин саламларĕç. Юбилейлă, ХХХХ-мĕш “Зарница” тата “Орленок” çарпа спорт вăййисене хутшăнакансене ăнăçу сунчĕç.
Тĕрлĕ енлĕн ăмăртрĕç çамрăк армеецсем. Савăнмалли те, пăшăрханмалли те сахал мар пулчĕ тăватă кун хушшинче. Конкурссен пĕтĕмлетĕвĕ хыççăн Тăвай шкулĕн икĕ команди те виççĕмĕш вырăн йышăнни çирĕпленчĕ. Тăван района çамрăксем пилĕк кубокпа таврăнчĕç. Нумай çул хушши ачасене çарпа спорт вăййисене хатĕрлес ĕçре вăй хунăшăн А.Пимулина ятарлă значок парса хавхалантарчĕç.
Сăн ÿкерчĕкре: пирĕн районăн ăмăрткайăкçипе зарничникĕсем “РФ тава тивĕçлĕ вĕрентекенĕ” хисеплĕ ята илме тивĕçлĕ пулнă А.Пимулин учительпе пĕрле.
Источник: "Ял ĕçченĕ"