18 июля 2008 г.
“Кăçал халăх пурăнакан мĕнпур вырăна çитиччен хытă сийлĕ çулсем тумалли программăна вĕçленĕ май Министрсен Кабинечĕ умне тĕллев лартатăп – муниципалитетсемпе пĕрле халăх пурăнакан мĕнпур вырăнсен тĕп урам сетьне асфальт сармалли программăна, çак ĕçе те 2015 çул тĕлне вĕçлеме палăртса, туса хатĕрлемелле...”, – тенĕ ЧР Президенчĕ Н.Федоров Патшалăх Канашне янă “Малашлăхшăн паян ĕçлетпĕр” Çырăвĕнче. Пирĕн районта кашни ялах асфальтлă çул хывнă темелле. “Дорстрой” тулли мар яваплăхлă общество çулсене лайăх шайра тытса тăрать, кирлĕ пулсан вăхăтра юсаса çĕнетет. Асăннă коллектива чылайранпа В.Васильев ăнăçлă ертсе пырать. Вĕсем халь кÿршĕ районсенче тăрăшаççĕ çул сарас енĕпе.
Асăрхаман мар пулĕ-ха çул çÿрекенсем Улянкă ялĕ çывăхĕнчи айлăмран пуçласа Сăхăтпуç еннелле пăрăнса кĕрекен çул патне çити çĕнĕрен асфальт сарнине. Республика шайĕнчи çула Канашри ДРСУ ĕçченĕсем çĕнетеççĕ иккен. Автомашинăсем вашлаттарайса иртеççĕ халь яка çулпа. Лайăх çулпа çÿреме аван ĕнтĕ. Çулсерен илемленсех пырать пирĕн тăрăх çапла.
Сăн ÿкерчĕкре: Улянкă çывăхĕнчи асфальтлă çул çинче Канашри çул-йĕр ĕçченĕсем тăрăшаççĕ.
А.НИКИТИНА сăн ÿкерчĕкĕ.
Источник: "Ял ĕçченĕ"