18 июля 2008 г.
Тушкилти вăтам шкулта çуллахи каникул кунĕсенче “Эврика” профиль лагерĕ йĕркеленĕ. Лагере çÿрекен 8-10 классенчи вĕренекенсем З.Кириллова воспитатель ертсе пынипе экологипе, химипе тата биологипе тĕпчев ĕçĕсем туса ирттереççĕ, çĕнĕ информаци технологийĕсемпе усă курса проектсем çыраççĕ, вĕсене презентацире хÿтĕлеме хатĕрленеççĕ. Лагере 20 вĕренекен çÿрет. Профиль лагерьне йĕркелени ачасенче пĕлÿ патне туртăнаслăха, тĕпчев пултарулăхне, хăйтĕллĕнлĕхе аталантарма, тăван тавралăхпа çывăхраххăн паллашма, тавракурăма анлăлатма пулăшать. Вырăнти тĕслĕхсем çинче ачасем экологи ыйтăвĕсене тĕпчеме, çутçанталăк объекчĕсене хисеплеме вĕренеççĕ. Зинаида Владимировна ертсе пынипе лагере çÿрекенсем пулă кÿллине, унти чĕрчунсен, ун таврашĕнчи ÿсентăрансен тĕсĕсене, шкул пахчинчи ÿсентăрансене тĕпчерĕç. Иртнĕ çул вĕренекенсем ялти çăлкуçсемпе тарасасене шута илчĕç, шыв пахалăхне тĕрĕслерĕç.
“Эврикăра” çамрăк историксем те пур. Л.Григорьева вĕрентекен сĕннипе ачасем районти демографи лару-тăрăвне, Тушкилпе Ямпулатра тата Сăхăтпуçĕнче хушма ятсем мĕнле пулса кайнине тишкереççĕ, камсем механизаторта ĕçленине тата халĕ ĕçлекенсене шута илеççĕ.
Паллах, вĕренекенсем тĕпчев ĕçĕсемпе кăна вăхăта ирттермеççĕ, вĕсем экскурсисенче пулаççĕ, вăйăсем выляççĕ, сывлăха çирĕплетеççĕ. Вăхăт савăнăçлă, пысăк кăсăкланупа иртет.
Ачасем пĕтĕм даннăйсене компьютера кĕртеççĕ. Çакнашкал тĕпчев ĕçĕсене вĕсем хаваспах хутшăнаççĕ. Вĕсен ĕçĕ шкулшăн та, ялшăн та усăллă пуласса шанас килет.
Вĕренекенсем лагерьте ирхине 8 сехет те 30 минутран пуçласа 14 сехет те 20 минутчен пулаççĕ. Лагерь начальникĕ – Эльвира Григорьевна Илларионова.
Сăн ÿкерчĕкре: лицей класĕнче вĕренекен Анета Пахомова (вăл Канаш районĕнчи Ушанартан çÿрет) пыл пахалăхне тĕрĕслет.
А.НИКИТИНА сăн ÿкерчĕкĕсем.
Источник: "Ял ĕçченĕ"