01 июля 2008 г.
Çимĕк кунне Йăнтăрчăра ял уявĕ те иртнĕ. Ăна клуб патĕнчи лапамра ирттернĕ. Ку вырăна ял центрĕ, ял-йыша пĕтĕçтерсе тăракан вырăн тесен те йăнăш пулмĕ: ял поселенийĕпе “Луч” ЯХПК администрацийĕсем, шкул, почта, клуб, фельдшер пункчĕ, ача сачĕ, суту-илÿ точкисем вырнаçнă тата ытти те. Автобус остановки те çывăхрах.
Ял уявне сăмах каласа Йăнтăрчă ял поселенийĕн пуçлăхĕ Ирина Петровна Хайдукова уçнă, пухăннă çынсене уявпа саламланă. Унтан вăл ку чухне ялăн социаллă инфраструктури вăй илсе пыни, асфальтлă çул-йĕр, çут çанталăк газĕ ял çыннисене ырлăх кÿнине палăртнă. Планра – халăха ĕçмелли паха шывпа тивĕçтерессине лайăхлатасси. Проект хатĕр, ăна 2009 çулта пурнăçламалли программăна кĕртес шанăç пур. Ял поселенийĕн территорийĕнчи ытти ялсене пахалăхлă шывпа тивĕçтересси те тимлĕхре. Çакăнпа пĕрлех ялсенчи урамсене асфальт сарса йĕркелесси те сарăлсах пырĕ.
Йăнтăрчăпа тата ытти ялсене тирпей-илем кĕртессипе нумай ĕçленине те асăнчĕ Ирина Петровна. Тасалăх, илем, тирпейлĕх – пĕтĕмпех хамăршăн, терĕ. Çамрăк çемьесем хушăнса пыни, çурт-йĕр, хуралтăсем çавăрни, çынсем харпăр хăй кил-хуçалăхне аталантарса пыма тăрăшни те, çав тĕллевпе çăмăллăхлă кредитсем илсе анлăн усă курни те савăнтарать ял поселенийĕн пуçлăхне тата ытти те.
Ял пуянлăхĕ чи малтанах, паллах, – унта пурăнакан çынсем, вĕсен ĕçĕ-хĕлĕпе пултарулăхĕ, йăли-йĕрки, творчестви... Ял уявĕнче вĕсемпе чылай туллин паллашма май килнĕ. Анлă выставка йĕркеленĕ ял уявĕнче. Чăваш наци тумĕ, тĕрлесе, эрешлесе, çыхса е тĕртсе тунă япаласем умĕнче халăх чылайăн пуçтарăннă. Хăш-пĕр япаласене “мĕншĕн сутмастăр, савăнсах туяннă пулăттăмăр”, теççĕ. 85 çулхи Серафима Спиридоновна Кумысова ал ĕç ăсти, сăмахран, хăех тĕрленĕ, çыхнă япаласем миçе тĕрли тăратман-ши; Ăстасем чăннипех çук мар ялта. Ĕç династийĕсен сăн ÿкерчĕкĕсем умĕнче те чарăнса тăраççĕ çынсем, тимлĕн тишкереççĕ вĕсене. Уявра ялти паллă, пултаруллă çынсене, мăшăрланса нумай çул татуллă пурăнакансене, ырă енĕпе палăрнă уйрăм çынсемпе çемьесене палăртса хăварнă, саламланă, дипломсемпе парнесем парса чысланă. Вĕсене маларах асăннă ал ĕç ăсти Серафима Кумысова та, Борис Борисов, Алексей Кириллов, Кирилл Кириллов, Сергей Андреев çамрăк спортсменсем те, тăван тавралăхшăн тăрăшакан Геннадий Сорокин, Федор Михайлов, Елена Игнатьева, Ольга Васильева та, чи лайăх харпăр хăй хуçалăхшăн Сергей Тихомиров та, чи хитре палисадникшĕн Татьяна Александрова та, чи тирпейлĕ кил-çуртшăн Валерий Кузьмин та тивĕçнĕ тата ытти те.
Ял уявĕнче “Тăвай ен” ушкăн тата вырăнти художество пултарулăх ĕçченĕсем концерт кăтартнă, юрă-кĕвĕ янăранă, кунтах волейболла, футболла вылянă, суту-илÿ пынă. Аван иртнĕ ял уявĕ, халăх асăнче нумайлăха юлĕ вăл.
Источник: "Ял ĕçченĕ"