20 июня 2008 г.
Çамрăклăх вăл – хăй илем,
Çав илеме туйма пĕлесчĕ.
Юрлас, ташлас ăсталăха
Малалла аталантарасчĕ.
Çамрăк талантсене тупса палăртас, вĕсен пултарулăхне малалла аталантарас тĕллевпе иртрĕ Тăвай ялĕнче эстрадăн çамрăк юрăçисен “Тăвай шевлисем” ятлă фестивалĕ. Унта тинтерех кăна çак çул-йĕр суйласа илнисем те, республикăра иртекен “Кĕмĕл сасă” фестиваль дипломанчĕсем те хутшăнчĕç.
Юрă хыççăн юрă янăрарĕ Тăвайри культура çурчĕ умĕнчи сцена çинче. Вырăсли те, чăвашли те, юрату юрри те шăранчĕ концерт вăхăтĕнче. Пурнăç çулĕ çăмăл марри, анчах унран хакли çукки пирки юрăпа ăнлантарма тăрăшрĕç çамрăк юрăçсем. «Тăван шкулăм, эс яланах асра» текен шухăша та аталантарчĕç фестивале хутшăнакансем.
Уява Тăвайри ачасен искусствисен шкулĕнчи фольклор ушкăнне çÿрекенсем “Саламлатпăр” юрăпа уçрĕç. Ушкăн ертÿçи Н.Петрова хăй те вĕренекенĕсемпе пĕрле сцена çинче юрă хыççăн юрă шăрантарчĕ.
Пухăннисене район пуçлăхĕн çумĕ Г.Гаврилов Раççей кунĕпе саламларĕ, пурне те çутă ĕмĕчĕсене пурнăçа кĕртме ăнăçу сунчĕ.
Жюри членĕсем юрăçсене тĕрлĕ номинаципе хакларĕç. “Автор-юрăçă” текеннинче Тушкил ял тăрăхĕн чысне хÿтĕлекен В.Захаровăна çитекенни пулмарĕ. Вăл хăйĕн ытарайми сассипе, сцена çинче хăйне мĕнлерех тыткаланипе жюри членĕсене çеç мар, итлекенсене тыткăнларĕ. Куракансен парнине те тивĕçрĕ Виктория.
Дуэтсем хушшинче Тăвайри Наташа Табаковăпа Ирина Козлова мала тухрĕç.
“Соло-вокал” номинацири çĕнтерÿçе палăртма çăмăлах пулмарĕ конкурса хак паракансене. Республикăри “Кĕмĕл сасă” фестиваль дипломанчĕсемпе – А.Матросовпа тата М.Ивановăпа пĕр танах çĕнтерÿçĕ ятне илессишĕн Çĕнĕ Пуянкасси пики Настя Степанова, Енĕш Нăрваш хĕрĕ Катя Тихонова, Тăрмăш каччи Женя Семенов тупăшрĕç. “Тăвай шевли–2007” фестиваль çĕнтерÿçи Алексей Матросов “Соло-вокал” номинацири 1-мĕш вырăна хăйĕн аллинчен вĕçертмерĕ, юрлас ăсталăхне малалла аталантарнине тепĕр хут кăтартса пачĕ, “Хрусталь башня” парнене тивĕçрĕ.
Фестиваль кубокне, “Гран-прине”, Тăрмăш йĕкĕчĕ Евгений Семенов илме тивĕçлĕ пулчĕ. Вăл хăйĕн юрлас ăсталăхне туллин уçса пачĕ. Унăн юррисем кашнин чĕринех пырса тиврĕç пулĕ. Женя сцена çине пĕрремĕш хут кăна тухмасть. Çапах та ку пысăк çĕнтерÿ уншăн малашлăх çăлкуçĕ пуласса шанса тăратпăр. Республика шайĕнче иртекен фестиваль-конкурссен лауреачĕ, çĕнтерÿçи пулма ăнăçу сунатпăр Тăрмăшри Е.Семенова.
Сăн ÿкерчĕксенче: “Единая Россия” партин вырăнти уйрăмĕн ертÿçи, жюри членĕ И.Петрова Тăрмăшри Е.Семенова парне парать.
Источник: "Ял ĕçченĕ"