29 апреля 2008 г.
Шкул ачисем хушшинче футболла выляса "Сăран мечĕк" клуб парнине çĕнсе илессишĕн пынă районти ăмăртусем вĕçленчĕç. Зонăсенчен финала Тăвай, Тĕмер, Тушкил, Енĕш Нăрваш, Тăрмăш шкулĕсен командисем тухрĕç. Тăвайсем 3 ушкăнĕнче те çĕнтерÿçĕсем пулса тăчĕç. Аслă ушкăнра вĕсем тушкилсемпе тĕмерсене 3:0, нăрвашсене 6:1 шутсемпе парăнтарнă (команда тренерĕ М.Алексеев). Тĕмерсем туш-килсемпе 2:2 шутпа вылянă хыççăн 2-мĕш, тушкилсем 3-мĕш вырăнсем йышăннă.
Вăтаммисен ушкăнĕнче 2-мĕш вырăна Нăрваш шкулĕ тухрĕ. Нăрвашсем нумай вăхăт малтисен йышĕнче курăнманччĕ-ха, анчах юлашки вăхăтра волейболра кăна мар, футболра та палăрма пуçларĕç (аслă ушкăнра финалта 4-мĕш пулчĕç).
Тĕмерсем футбола юратаççĕ, ăна традици теме те пулать. Ахальтен мар вĕсем 3 ушкăнра та малтисен йышне кĕнĕ (вăтам ушкăнра 3-мĕш, кĕçĕннинче – 2-мĕш вырăнсем). Кĕçĕннисен ушкăнĕнче вĕсем тăвайсене 1:2 шутпа выляса янă хыççăн çав шутпах тăрмăшсене парăнтарма пултарчĕç.
Источник: "Ял ĕçченĕ"