27 сентября 2019 г.
Юпа уйăхĕн пĕрремĕшĕнче çуллен Пĕтĕм тĕнчери ватă çынсен кунне паллă тăваççĕ.
Чăвашстат пĕлтернĕ тăрăх, республикăра 2019 çул пуçланнă тĕле пурĕ 1223 пин çын пурăннă, 315 пинĕшĕ - аслă ăрурисем, 95 пин арçын, 220 пин хĕрарăм. 178 пин çын - хулара, 137 пинĕшĕ ялта пурăнаççĕ. Чăваш Енре 80 çултан иртнĕ 46 пин çын пурăнать, 90 çулта е аслăраххисем - 6 пин ытла çын, 100 çулхи юбилейне паллă тунисем - 114.
Пурнăçăн кĕрхи тапхăрĕнче те çемье пысăк пĕлтерĕшлĕ тата тĕп вырăнта шутланать. Çак ÿсĕмре те ватăсем иккĕмĕш çуррине тупаççĕ. ЗАГС органĕсен кăтартăвĕсем тăрăх пурĕ 120 аслă мăшăр йĕркеленнĕ. Çав шутра 96-шĕ хулара, 24-шĕ ялта.
2018 çулта ĕçлемелли ÿсĕмрен иртнĕ 54 пин çын экономикăра тăрăшнă, 70 проценчĕ хĕрарăм, вăтăр проценчĕ арçын.
2016 çулта халăхăн пурнăç условийĕсене комплекслă тĕпченин кăтартăвĕсем тăрăх ватă çынсенчен çурри активлăхпа палăраççĕ, походсене хутшăнаççĕ (24 процент), уçă сывлăшра хусканусем тăваççĕ (22 пр.), бассейнсенче шыва кĕреççĕ (19 пр.). Концертсене çÿрекенсем (29 пр.), кафесемпе ресторансене каякансем (18), экскурсире пулакансем (8 пр.) те пур ватăсем хушшинче.
Пенсире канакансен 42 проценчĕ Интернета хăйсем тĕллĕн е çывăх çыннисем пулăшнипе тухаççĕ.
2018 çулта ĕçлекен ÿсĕмрен аслăраххисен 10 проценчĕ пурăнакан вырăнсене улăштарма пултарнă.
РФ пенси фончĕн районти уйрăмĕнчен пĕлтернĕ тăрăх, Тăвай районĕнче паянхи кун тĕлне ватлăхпа пенси илекен 4250 çын пурăнать. Вĕсенчен 713-шĕ - 80 çул урлă каçнă.
Ырлăхпа хисеп кунĕпе саламлатпăр аслă ăру çыннисене.