20 сентября 2019 г.
Пирĕн ентеш, РСФСР тава тивĕçлĕ, Чăваш АССР халăх артисчĕ Николай Степанов çуралнăранпа 95 çул çитрĕ. Ăна асăнса К.Иванов ячĕллĕ Чăваш патшалăх драма театрĕнче асăну каçĕ иртнĕ.
Николай Степанович 1947 çулта А.В.Луначарский ячĕллĕ ГИТИСăн актер факультетене пĕтернĕ. 46 çул хушшинче 200 ытла сăнар калăпланă. Александр Пушкин ?«Никита Бичурин», В.Романов%, Миххи («Асран кайми кунсем», Çемен Элкер), Победоносиков («Мунча», В.Маяковский), Иван («Кай, кай Ивана, Н.Айзман), Якку («Пушар лаши», Н.Терентьев) тата ыттисем.
Нумайăшĕ сăмах тухса каланă асăну каçĕнче. Пирĕн ентеш, Енĕш Нăрвашра çуралса ÿснĕ Вера Кузьмина ГИТИСра пĕрле ирттернĕ çулсене аса илнĕ.
Тăвай енрен те сумлă делегаци пулнă мероприятире. Район администрацийĕн пуçлăхĕ Владимир Ванерке Николай Степанов ячĕ тăван ен тăрăхĕн чи сумлă çыннисен хушшинче пулнине палăртнă.
Райадминистрацин пай начальникĕ Валерий Чайкин та тухса калаçнă. Хăй вăхăтĕнче Николай Степанов Вера Кузьминапа, Нина Яковлевапа, Нина Григорьевапа, Виктор Родионовпа тата ытти артистсемпе пĕрле вылянă спектакльсене аса илнĕ. Валерий Васильевич хăй те сценăпа туслă. Тăвайри халăх театрĕнче выляканскер Н.Степанов çамрăксемшĕн ăста наставник пулнине асăнса хăварнă.
«Хăйĕн пуян опытне пирĕн пултаруллă ентеше, Тăрмăшра çуралса ÿснĕ, драма театрĕнче вылякан Сергей Иванова та пама май тупнă,-тенĕ вăл,- Тăвай ялĕнчен тухнă паллă актерăн ратнинчи çынсем те ĕçченлĕхпе палăрса тăраççĕ. Пĕр вăхăтра Чăваш академи драма театрĕнче районтан тухнă 8 çын выляма пултарнă. Вĕсенчен пĕри Николай Степанов пулни мăнаçлантарать. Вăл та «Виçĕ туй» спектакльте вылянă. Эпĕ вара Тăвай артисчĕсемпе çак спектакльпе районти куракансене савăнтарнă».
Асăну кунне актерăн мăшăрĕ Роза Алексеевна, хĕрĕ Эльвира Николаевна хутшăннă, çывăх çыннине асра тытнăшăн тав тунă.