20 сентября 2019 г.
Кашниншĕнех хаклă шкулта вĕреннĕ çулсем. Эпир вăтам пĕлÿ илме районти вунă ытла ялтан çÿренĕ Тăвайне. Пĕлÿ çурчĕ сăртра вырнаçнă майăн самай пылчăк çăрма, юр ашма тивнĕ. Çакă нимĕн чухлĕ те вĕренес кăмăл-туйăм çинче палăрман. Чăваш халăхне çутта кăлараканĕ Иван Яковлев уçнă шкулта пĕлÿ пухма май килнишĕн хавхаланнă пурте. 1969 çулта эпир, виçĕ вуннăмĕш класри 94 ача, алла аттестат илсе Тăван çĕршывăн тĕрлĕ кĕтесĕсене салантăмăр. Тĕлĕкри пек темелле-и, унтанпа çур ĕмĕр хыçа илчĕ.
Шкулпа сывпуллашнăранпа 50 çул çитнĕ ятпа çак кунсенче тĕлпулу йĕркелерĕмĕр. Хăшĕ-пĕринпе шкултанпах та курман. Кашнинех аса илме тăрăшрăмăр. Математикăпа тата вырăс чĕлхипе литературине вĕрентнĕ Ольга Федоровна Шишовапа Луиза Ивановна Кондратьева кашни тĕлпулăвах килме май тупаççĕ. Паян та пĕрле пулчĕç хăйсен вĕренекенĕ-семпе. Класс ертÿçи пулнă Ольга Васильевна Пятницкая тахçантанпах пирĕн хушăра çук ĕнтĕ. Нина Петровна Желтована йыхрав ятăмăр. Вăл Шупашкарта пурăнать, 90 çултан иртнĕскере çула тухма йывăртарах ĕнтĕ. Хăйне манманшăн тав туса, пурне те ырă сывлăхпа ăнăçу сунчĕ вăл.
Тăвайри вăтам шкул директорĕ Вера Михайловна Кириллова пире питех те ăшшăн кĕтсе илчĕ. Вĕренÿри çĕнĕлĕхсемпе интереслентĕмĕр эпир. Кунти коллектив «Вĕренÿ» наци проекчĕпе килĕшÿллĕн тĕрлĕ ĕç-пуçсене хутшăнать. Шкул нумаях пулмасть республика грантне çĕнсе илнĕ, темиçе хутчен Раççейри чи лайăх вĕренÿ учрежденийĕсен йышне кĕнĕ. Тĕрлĕ кабинетсем ку чухнехи оборудованисемпе пуянланса пыраççĕ.
Чăнах та, кашнин асĕнчех ырă йĕр хăварнă Тăвай шку- лĕнче пĕлÿ илнĕ çулсем. Пĕрле вĕреннĕ ачасем маттур пулнă, тĕрлĕ конкурс-ăмăртусенче палăрнă. Ытларахăшĕ аслă вĕренÿ заведенийĕсенче ăс пухнă. Акă, Владилен Григорьев кунта та хăйĕн пуçарулăхне кăтартса пачĕ. Вăл хатĕрленĕ «Шкул пурнăçĕ» презентацине пăхнă май чуна парса ĕçленĕ вĕрентекенсене куç умне кăлартăмăр. Шкул директорĕ Вениамин Терентьев пулнă ун чух. Икĕ Василий Иванович Ивановсене те манман, пĕри - хими, тепри физкультура учителĕ пулнă. Физикăпа хими предмечĕсене юратма вĕрентнĕ Михаил Леонтьевич Леонтьевпа Мария Петровна Козлова та шкул вăхăтне аса илтерчĕç. Çакна палăртма кăмăллă, пире вĕрентнĕ педагогсенчен ытларахăшĕ хисеплĕ ятсене тивĕçнĕ.
Владилен Иванович çавăн пекех 50 çултан тĕл пулнă саманта асра хăварма ятарлă значок тутарса килнĕ. Тĕлпулăва Самарăран, Тюмень, Владимир облаçĕсенчен, республикăн тĕрлĕ хула-районĕсенчен, ялĕсенчен килнĕ. Пурте вĕсем ĕçпе тава тивĕçнĕ çынсем. Шăкăл-шăкăл калаçнă майăн шкулпа çыхăннă юрăсене шăрантартăмăр. Ĕçĕпе кăна мар пултаруллă иккен «Дружба» хуçалăх ертÿçи пулнă Анатолий Салканов, илемлĕ сасси-юррипе те ыттисене хавхалантарса пычĕ. Кашниех хăйĕн пурнăçĕпе, ĕçĕ-хĕлĕпе паллаштарчĕ.
Паян та ĕç вахтинче-ха хăшĕ-пĕрисем. Анатолий Филиппов Шупашкарти агрегат заводĕнче тимĕрçĕре ĕçленине пĕлтерчĕ. Галина Шибалова страховани тытăмĕнче тăрăшать. Сăхăтпуçĕнчи Владислав Храмов - предприниматель. Тăвайри газ участокĕн ертÿçи Владимир Семенов та хальтерех кăна ĕçĕпе сывпуллашрĕ-ха. Самар хулинчи больницăра вăй хуракан Галина Чернова хирурга ĕçтешĕсем хисеплеççĕ, çамрăксем те наставникне ырă сывлăх сунаççĕ.
Çапла, çур ĕмĕр хыçа юлчĕ Тăвай шкулĕнчен вĕренсе тухса кайнăранпа. Манăçмаççĕ çунатлă вăхăтсем, нимпе виçейми тарăн йĕр хăварнă шкул çулĕсем.