13 сентября 2019 г.
Районта вырма ĕçĕсем вĕçленнĕ тесен те юрать. Ĕнерхи кун тĕлне тырă уйĕсен 9990 гектарĕ (99 процент) пушаннă. Пÿлмесене 22480 тонна тырă кĕнĕ. Тухăç кашни гектартан 22,5 центнерпа танлашнă.
Тĕш тырă культурисен чи пысăк лаптăкĕ «Акконд-агро фирмăн» пулнă. 1155 гектар çинче çитĕнтернĕ ăна кăçал обществăра, кашни гектарĕнчен 34,1-шер центнер тухăç илнĕ. Аккондçăсем тыр-пул пухса кĕртнипе пĕрлех выльăх апачĕ хатĕрлесси çине те пысăк тимлĕх уйăраççĕ, сентябрĕн 12-мĕшĕ тĕлне 1306 тонна утă, 3790 тонна сенаж хатĕрленĕ. Районĕпе илсен, ĕнерхи кун тĕлне кашни условнăй выльăх пуçне 21,2 центнер апат единици хатĕрленĕ. Сенаж пурĕ - 19020 тонна, утă - 7930 тонна.
Районĕпе кĕр тыррисем акма 2850 гектар çĕр хатĕрленĕ. 2340 гектар кĕр тыррисем акнă, пĕтĕмпе 2480 гектар çинче çĕртме сухи тунă. «Акконд-агро фирма» кĕрхи культурăсене чи пысăк лаптăк - 400 гектар çинче акнă. Паян-ыран общество ĕçченĕсем кукуруза уйне куçĕç, 330 гектар çинче çитĕн-тернĕ «уй патшине». Çак культурăна çавăн пекех Грачев, Илларионов ХФХсенче, «Чутеевский» хуçалăхра акнă.
Çĕрулмине Михайлов, Восторгин, Канясев хуçалăхĕсенче лартнă. Çак вăхăт тĕлне «иккĕмĕш çăкăра» 10 гектар çинчен кăларса пухнă, хальлĕхе тухăç пĕр гектар пуçне 204 центнерпа танлашать.
Пахча çимĕçсене илес пулсан, Андрей Кузнецов хуçалăхĕн-че 5 гектар çинчен 35 тонна севок, 1 гектар çинчен 20 тонна кишĕр пухса кĕртнĕ. 1 гектар çинчи купăстана касмалли юлнă фермер хуçалăхĕнче.