13 сентября 2019 г.
Сергей Михайлов хресчен-фермер хуçалăхĕ пурĕ 349 гектар çинче ял хуçалăх культурисене çитĕнтернĕ. Пĕрчĕллĕ тата пăрçа йышши культурăсем 230 гектар çинче йышăннă, техника культурисем - 63 гектар, çĕрулмине 25 гектар çинче вырăн панă. Тыр-пула Сергей Михайлов хресчен-фермер хуçалăхĕ çухатусăр пухса кĕртнĕ, вăтам тухăç пĕр гектар пуçне 30 центнерпа танлашнă.
Паянхи кун асăннă коллектив çĕрулми пухса кĕртессипе тимлет. Ретсем тăрăх трактор тикĕссĕн шăвать, лайăх çанталăкра çынсем те хавхалансах тăрăшаççĕ. Тулли тиевлĕ автомашинăсем рейс хыççăн рейс тăваççĕ. «Гала» тата «Роко» çĕрулми сорчĕсем аван çитĕннĕ. «Иккĕмĕш çăкăр» гектар пуçне 200 центнер ытла пуласса кĕтеççĕ ял хуçалăх ĕçченĕсем. «Çĕрулми, ай, парать те тухăç»,-тесе хĕпĕртеççĕ хастарскерсем. Кунта ĕçлекенсене агитбригада та савăнтарнă.