06 сентября 2019 г.
Вырсарникун сакăр сехетсенче районти ачасем капăр тумсемпе, чечек çыххисемпе шкулсем еннелле çул тытнă. Пĕлÿ кунне халалланă савăнăçлă мероприятисем пуçланнă 10 сехетре. 2019-2020 вĕренÿ çулĕнче Тăвай енри 1493 вĕренекен партăсем хушшине ларнă, вĕсенчен 140-шĕ - пĕрремĕш классем.
Тăвайри вăтам шкулти савăнăçлă линейкăна шкул директорĕ В.Кириллова уçнă. Вăл ачасемпе ашшĕ-амăшĕсене, педагогсене Пĕлÿ кунĕпе саламланă. Çĕнĕлĕхсемпе паллаштарнă, шкулта цифрăпа гуманитари профилĕсен «Ÿсĕм çулĕ» вĕренÿ центрĕ уçăлнă, классемпе спортзала юсанă, çĕнĕ учебниксемпе оборудованисем илнĕ.
Çавăн пекех район администрацийĕн пуçлăхĕн заместителĕ - вĕренÿ пайĕн начальникĕ О.Ломоносов, Тăвай ял тăрăхĕн пуçлăхĕ Н.Сормов, шкулти ашшĕсен Канашĕн председателĕ Н.Перцев тухса калаçнă, пухăннисене ĕçре тата вĕренÿре ăнăçусем суннă.
Пĕрремĕш класа каякансем сăмах илнĕ ун хыççăн. 61 вĕренекен пуçласа партăсем хушшине ларнă кăçал Тăвайри шкулта. 1 «б» класс ертÿçи Н.Потапова вĕренекенсене пĕлÿ тĕнчипе шикленмесĕр утма сĕннĕ. Ашшĕ-амăшĕсенчен А.Петрова трибуна умне тухнă.
Пĕрремĕшсем - А.Тимофеев, М.Григорьева, Д.Ванерке, С.Буинцев тата аслă классем - А.Григорьев, Ю.Лисов, М.Михайлов, Н.Иванов пĕрремĕш шăнкăрав панă.
Унтан пурте пĕрремĕш класс сехетне хутшăннă.
Енĕш Нăрвашри вăтам шкул умне пухăннисене те авăн уйăхĕн пĕрремĕш кунĕнче тÿпери сарă хĕвел çупăрланă. Кăçал кунти йыша пĕрремĕш класа каякан 11 ача хушăнать.
Шкул директорĕ Валерий Ильин пухăннисене Пĕлÿ кунĕпе саламланă, çĕнĕ вĕренÿ çулне хатĕрлеме шкулта тĕп юсав ĕçĕсем пыни пирки пĕлтернĕ. Шкула илемлетме хутшăннисене тав тунă.
Район администрацийĕн пуçлăхĕ В.Ванерке, вĕренÿ пайĕн методисчĕ А.Николаева, Мускаври автомобильпе çул-йĕр университечĕн Шупашкарти филиалĕн директорĕ Н.Евсюкова, Енĕш Нăрваш ял тăрăхĕн пуçлăхĕ Р.Егоров, «Уютстрой» ООО генеральнăй директорĕ А.Васильев, районти депутатсен Пухăвĕн депутачĕ Ю.Ефимов, педагогика ĕçĕн ветеранĕ В.Петров ăшă сăмахсем каланă, шкула парнесем панă. Пĕрремĕш класа каякансене выпускниксем лайăх вĕренме суннă. Юлашкинчен вунпĕрмĕшĕнчи Д.Лисицынпа пĕрремĕшĕнчи У.Владимирова шăнкăрав панă.
Тĕмерти вăтам шкул та Пĕлÿ кунĕнче алăкĕсене уçнă çуллахи каникул хыççăн. Пĕрремĕш класа каякан 8 ачана алă çупса кĕтсе илнĕ пухăннисем. Вĕсене пĕлÿ тĕнчипе Е.Степанова илсе çÿрĕ.
Шкул директорĕ А.Николаева, район администрацийĕн пуçлăхĕн заместителĕ - организаципе контроль ĕçĕсен тата информаципе тивĕçтерекен пай начальникĕ В.Чайкин, информаципе аналитика центрĕн методисчĕ А.Сормова, Тĕмер ял тăрăхĕн пуçлăхĕн заместителĕ С.Ярхунова тата ашшĕ- амăшĕсем çĕнĕ вĕренÿ çулĕнче пысăк çитĕнÿсем тума сĕннĕ ачасене.
Пĕрремĕш шăнкăрав пама тăххăрмĕшĕнчи Э.Трифоновпа пĕрремĕшĕнчи А.Краснова тивĕçлĕ пулнă. Чи малтан шкула пĕрремĕш класа каякансем вуннăмĕшсемпе пĕрле кĕнĕ.