06 сентября 2019 г.
Пирĕн республикăра авалтанпах çемье йăли-йĕркипе çыхăнулăхне упраççĕ. Çемье - чăвашăн тĕп пуянлăхĕ.
Кашни çын çемьеленме пултарать пирĕн çĕршывра, унăн çирĕплĕхне упрасси вара кунсерен тумалли пĕрлехи ĕç. Çемье умне ыйту сиксе тухсан, специалистпа канашламалла. Уйрăмах çамрăк çемьесен. Пĕрле пурăннин малтанхи çулĕсенчех проблемăсене татса пама çăмăл мар, çавăн чухне хăвăрăнне кăна мар, çемье членĕсен ыйтăвĕсен хуравне те илмелле.
Йывăр лару-тăрăва кĕрсе ÿкнĕ çемьесене, пĕр çулпа тин кăна утма пуçлакансене психологиллĕ пулăшу парас тĕллевпе Чăваш Енри юстици министерстви «Çемьене упратпăр» проект туса хатĕрленĕ.
Проекта пурнăçа кĕртнĕ май, ЗАГС органĕсен работникĕ-сем, Шупашкарти çул çитменнисене реабилитацилекен центр психологĕсем, Шупашкарпа Чăваш Ен епархийĕн представителĕсем лекцисем, семинарсем, тренингсем ирттереççĕ, çемье ыйтăвĕсемпе консультацисем параççĕ. Вĕсенче мăшăрсем хăйсен ыйтăвĕсем çине хурав илме пултараççĕ.
ЗАГС-а заявлени тăратнă хĕрпе каччăна психологи занятийĕсене çÿреме йыхравлаççĕ.
Пĕр-пĕрне юратма, ăнланма, телейлĕ тата сывлăхлă ачасем ÿстерессипе сĕнÿсем параççĕ тин кăна мăшăрланакансене.
Уйрăлма заявлени çырнисемпе специалист-психолог, çемье медиаторĕ канашлаççĕ, уйрăлассинчен пăрăнма хистеççĕ.
Проектпа килĕшÿллĕн çамрăксем мăшăрланма хатĕр пулнине татса паракан ыйтусем çине тĕрĕс хуравсем илме вĕренÿ организацийĕсенчи студентсемпе тăтăшах тĕл пулса канашлаççĕ.
Юлашки пилĕк çул хушшинче Чăваш Республики уйрăлакансен йышĕ пĕчĕк пулнипе палăрса тăрать. Раççейри статистика кăтартăвĕсем тăрăх Чăваш Республики Атăлçи федераци округĕнче 2,9 коэффициентпа - пĕрремĕш, РФ субъекчĕсем хушшинче çиччĕмĕш вырăнта (РФ-пе палăртнă коэффициент - 4,0, Атăлçи федераци округĕпе - 3,8).
Республикăри ЗАГС органĕсемпе Чăваш Енри хĕрарăмсен тата ашшĕсен канашĕсем, халăха социаллă хÿтлĕх паракан центрсем, опекăпа общественность органĕсем çемье хаклăхне çирĕплетессипе пĕрле ĕçленине пĕтĕмлетеççĕ палăртнă кăтартусем.
Пирĕн районта та çемьесене упраса хăварассишĕн тимлеççĕ, туслă мăшăрсене тĕрлĕ мероприятисене явăçтараççĕ. ЗАГСра "Çемье" клуб ĕçлет. Аслă классемпе те кунта занятисем ирттереççĕ.