30 августа 2019 г.
ĕрлĕ фестиваль, конкурссемпе ăмăртусем, истори пĕлтерĕшлĕ пулăмсем, фейерверк... Шупашкар хулин уявне халалланă эрне хыçа юлчĕ. Пин-пин çын ирех Мускав çыранне васканă иртнĕ шăматкун, Шупашкар хулин 550 çулхи юбилейне çÿллĕ шайра паллă тунă. Сарлака Атăл хĕрринчи «Тараватлă Чăваш Ен» фестиваль республикăри районсенче тата хуласенче пурăнакан кашни çынна хапăлласа йышăннă.
Чăваш çĕршывĕн тĕп хулин уявне килнĕ делегацисем хăйсем вырăнта туса илекен экологиллĕ таса продукцисен куравне йĕркеленĕ. Тутантарса та пăхнă пухăннисене, кăмăл тăвакансене туянтарнă та. Районсенчи ăста алăллисен япалисемпе те паллаштарнă. Нумай нациллĕ халăх юррисемпе ташшисене пурнăçланă чухне курма килнисем те чăтса тăрайман, артистсемпе пĕрле юрласа ташланă. Шупашкара 550 çул тултарнă ятпа кашни район хăйнеевĕрлĕ интереслĕ саламланă çапла, регион тĕп хулине мухтаса хăйсен брендчĕсемпе паллашма сĕннĕ, продукцийĕсене астивме йыхравланă. Чăваш Республикин Министрсен Кабинечĕн Председателĕн заместитетлĕ - Чăваш Ен Пуçлăхĕн Администрацийĕн ертÿçи Юрий Васильев, ĕç тăвакан влаçăн регионри органĕсен пуçлăхĕсем, хула тата администраци пуçлăхĕсем Евгений Кадышевпа Алексей Ладыков, муниципалитетсен ертÿçисем, тĕп хула хăнисем наци блюдисене тутаннă, районсен историйĕсемпе паллашнă.
Раççейри Çарпа-Сывлăш вăйĕсен «Вĕршĕнсем» авиаци ушкăнĕ уяврисен асĕнче нумайлăха юлакан сăнлăх кăтартнă. Чи пысăк вĕçев ăсталăхĕн фигурисене пурнăçланă истребительсен пилочĕсем.
Район администрацийĕн пуçлăхĕ Владимир Ванерке ертсе пынипе тăвайсем те хутшăннă Шупашкарти «Тараватлă Чăваш Ен» фестивале. Илларионов хресчен-фермер хуçалăхĕ, Данилов предприниматель, «Тăвайри сĕт-çу завочĕ» общество Тăвай ен чысне хÿтĕленĕ. «АККОНДМОЛОКО» тата «Тăвайри кооператив» потребобщество продукцийĕсен пахалăхне уйрăмах кăмăл тунă уява пухăннисем. Çынсен кăмăл-туйăмне купăсçăсен, «Задоринки», «Тăрмăш», «Тăвай ен» ансамбльсем, централизациленĕ клуб системин солисчĕсем çĕкленĕ.
Декораципе ĕçлевлĕх искусствин тĕрлĕ майĕпе те (йĕппе тата çекĕлпе çыхни, йывăçа касса эрешлени, вĕтĕ шăрçасемпе çыхни, тĕрлени, хулăсемпе çыхни) паллаштарнă тăвайсем. Евгений Николаевич Моряковпа Вера Петровна Абржина (Тăвай), Зоя Витальевна Семеновапа Венера Алексеевна Николаева ?Лачкасси%, Надежда Николаевнапа Михаил Васильевич Васильевсем (Çĕнĕ Пуянкасси)?, Алина Егоровна Владимирова (Йăнтăрчă), Наталия Викторовна Георгиева (Тушкил), Нина Григорьевнапа Людмила Андреевна Семеновасем (Тăрмăш) хăйсен ăсталăхĕпе паллаштарнă. Республика кунĕсене те хутшăнаççĕ вĕсем.
Хулара пурăнакансемпе хăнасем пирĕн район территорийĕнчи «Упа кĕтесĕ» кану базин атмосферинче пулса курнă.
-Хулара пурăнакансемпе хăнасене хула 550 çул тултарнипе саламлатпăр. Чăваш Ен тĕп хули - Шупашкар малалла та аталантăр, çавнашкал илемлĕ вырăнта пурăннипе эпир пурте мухтанатпăр,-тесе саламланă фестивале хутшăннисене Юрий Васильев.
Мускав çыранĕнче спортăн шыври тĕсĕсен фестивальне сап-карнавал уçнă. Гимн шăматкун пысăк сцена çинче пĕрремĕш хут янăранă.
Каçхине 19 сехетре çынсем Юрă уйĕнчи пысăк концерт программипе паллашнă, 22 сехетре тÿпене фейерверксен эрешĕсем илем кÿнĕ.