15 февраля 2019 г.
30 çул çитрĕ совет çарсене Афганистанран илсе тухнăранпа. Çак тискер вăрçă вунă çула тăсăлнă.
Тăвай енрен 177 каччă (Тăвайри çар комиссариачĕ урлă) ку вăрçă хаярлăхне хăйсен куçĕ-пе курнă, хăш-пĕрисем каялла таврăнайман. Унсăр пуçне районта çуралса ÿснĕ нумай яша тĕрлĕ çĕртен вĕренсе пĕтернĕ хыççăн Афган вăрçине илсе кайнă.
Акă, Тĕмер ялĕнчен кăна 10 çамрăк интернационалла тивĕçе пурнăçланă. Вĕсенчен çиччĕшĕ пĕр урамран - Турикасран. Пĕр çемьерен иккĕн пулнисем те пур. Владимирпа Петр Стифоновсенех илер. Вĕсем иккĕшĕ те тĕрлĕ наградăсене тивĕçнĕ. Владимир Николаевича вăрçă çулĕ-сенчех «Хăюлăхшăн» медальпе наградăланă. Служба хыççăн вăл тĕрлĕ çĕрте ĕçлерĕ. Ăста ÿкерет, паллă художниксенчен пĕрре те кая мар унăн ĕçĕсем. Шупашкарти худграф факультетĕн- че вĕренсе аслă пĕлÿ илнĕ вăл. Тăвайĕнчи краеведени музейĕнче халĕ Афганистанран совет çарĕсене илсе тухнăранпа 30 çул çитнине халалласа унăн картинисенчен ятарлă выставка хатĕр-лерĕмĕр (сăн ÿкерчĕкре). Пурне те пырса курма йыхравлатпăр.