21 сентября 2018 г.
Пирĕн районти Енĕш Нăрваш ялĕнче, 1903 çулхи авăн уйăхĕн çирĕм виççĕмĕшĕнче пулас çыравçă, Семен Фомич Фомин (Хумма) çутă тĕнчене килнĕ.
Малтанхи произведенийĕ-сем унăн 1920 çултах пичетленнĕ. Куçаруçă, литсотрудник, корректор, редактор пулса ĕçленĕ Семен Фомич. Унăн 30 ытла калавпа фельетон, 3 пьеса, 60 сăвă пичетленнĕ. «Йÿçĕрех-тутлă» романне çырса пĕтереймен. Чăваш литературин, çыравçăсемпе сăвăçсен пултарулăхĕн ыйтăвĕсене хускатакан критикăллă статьясем те нумай кун çути курнă пирĕн хисеплĕ ентешĕмĕрĕн. П.Беранже, Г.Гейне, В.Гюго, У.Уитмен, Д.Бедный, А.Фет, А.Кольцов тата ыттисен произведенийĕсене чăвашла куçарнă. «Пирĕн вăй», «Штурм», «Суйласа илнисем», «Орфей çĕнĕрен чĕрĕлни» кăларăмсем пур С.Фоминăн.