14 сентября 2018 г.
«Акконд-агро фирма» общество авăн уйăхĕн пуçламăшĕнче, кукуруза çăлса, выльăхсем валли силос хатĕрлеме пуçланă. «Уй-хир патшине» пурĕ 250 гектар вырăн панă вĕсем. «Класс-Ягуар» комбайн çăлать, ултă автомашина турттарать «симĕс массăна».
Юрий Яковлев механизатор ĕçлет «Класс-Ягуар» комбайнпа. «Пилĕк çул хушши тимлетĕп кукурузăна çăлса вĕтетес енĕпе»,-тет вăл. Олег Ильин, Алексей Васильев, Александр Птичкин, Владимирпа Артем Петровсем, Андрей Иванов симĕс массăна вăхăтра турттарса тăраççĕ.
Кукуруза аван çитĕннĕ. Унăн тухăçĕ «Акконд-агро фирма» обществăн тĕп агрономĕ Анатолий Михайлов хăйĕн ĕçне аван пĕлнинчен, тивĕçĕсене яланах вăхăтра пурнăçланинчен те килет.
«Саатбал» Австри фирмин «Лидано» сортне акнă аккондçăсем. Ир пулакан кукуруза иккен вăл, çулçисем те çÿллĕ, пучахĕсем те лайăх çитĕннĕ.