29 июня 2018 г.
Шăрăх кунсем тăраççĕ. Çавăнпа çынсем халь хаваспах шыв объекчĕсем çывăхĕнче канаççĕ. Шывра лайăх ишекенсен те хăрушсăрлăх правилисене çирĕп пăхăнмалла.
Ятарласа хатĕрленĕ вырăнсенче, официаллă пляжсенче кăна шыва кĕме юрать. 17-19 градус таран ăшăннă шывра, сывлăш температури 20-25 градус пулсан ишме сĕнеççĕ. 10-15 минутлăха кăна пулмалла шывра. Анчах малтан ỹт-пĕве шывпа йĕпетмелле.
Сивĕ шыва кĕрсен, ал-урана шăнăр туртма пултарать. Çакăн хыççăн çыран хĕррине тухма тăрăшмалла. Типĕ çĕртен аякра ишетĕр пулсан, çурăм çине çаврăнса выртмалла та, ерипен вырăнтан хускалмалла. Ишсе ывăннă çыннăн çак меле яланах асра тытмалла.
Иртнĕ кунсенче республикăри шыв объекчĕсенче 5 тата 6 çулсенчи ачасем путса вилнĕ. Ача-пăчана аслисемсĕр шыва кĕме ан ярăр. Асăрхануллă пулнине нимĕн те çитмест.
В.ИСАЕВ.