26 июня 2018 г.
Чутейри пĕтĕмĕшле вăтам пĕлỹ паракан шкул çумĕнчи сывлăха çирĕплетекен "Çăлтăрчăк" ("Звездочка") лагерьте 1-5 классенчи 20 ача каннă.
Н.Куракина, А.Орлова воспитательсем, Г.Петрова ертỹçĕ, спорт енĕпе В.Шамбулин, канакансен сывлăхне тĕрĕслесе тăракан Р.Гаврилова, Л.Беловапа Л.Антонова тутлă апат пĕçерекенсем ачасен кашни кунĕ манăçми пултăр тесе тăрăшнă. Программăра кашни кунăн хăйĕн ячĕ пулнă: ачалăх, Пушкин, сывлăх, туслăх, спорт, çут çанталăк, çулçỹревçĕсен, музей, хăрушсăрлăх, художниксен кунĕсем... "Раççей - манăн Тăван çĕршыв", "Эпир _ наркотиксене хирĕç" мероприятисем те асра юлĕç.
"Аль" ФСКна шыва кĕме çỹреме те питĕ килĕшнĕ вĕсене. Кĕçĕнреххисем кунтах ишме вĕреннĕ. Паллă вырăс поэчĕ А.С.Пушкин çуралнă кун çыравçăн юмахĕсене вуланă, вĕсенчи сăнарсемпе вăйăсем вылянă, ỹкерчĕксем тунă, викторина ирттернĕ. "Çăлтăр сехечĕ" ăс-тăн вăййи хамăр тăрăхри эмел курăкĕсене аван пĕлнине кăтартса панă.
Хăрушсăрлăх кунĕн хăни çул çитменнисемпе ĕçлекен районти инспектор А.Жилкина пулнă, пушă вăхăта мĕнле ирттернипе интересленнĕ, пур çĕрте те хăрушсăрлăх йĕркисене пăхăнмалли çинчен калаçнă, ыйтусем çине хуравланă.
Енĕш Нăрвашри музей директорĕ В.Петров ял историйĕпе, паллă çынсемпе паллаштарнă. Каннă вăхăтра ачасем ялти культура çурчĕпе библиотека ирттерекен мероприятисене хастар хутшăннă. Театр кунĕнче, акă, аслăраххисем юмахсенчи геройсем пулса пĕчĕкреххисене савăнтарнă. "Манăн тĕнче" ятлă ỹкерчĕксен конкурсĕнчи ĕçсем вĕсен ырă чун-чĕрисене, телейлĕ пуласлăха шаннине кăтартса параççĕ. Эпир, çитĕннисем, ỹссе пыракан ăрăва сывлăх, телей, тăнăç пурнăç сунатпăр.
З.ИВАНОВА.
Чутей ялĕ.