Публикации » Нумайранпа сывлăх сыхлавĕнче

02 марта 2018 г.

Вăрманхĕрри ялĕнчи Лариса Михайловна Никитина хăйĕн пурнăçне халăх сывлăхне сыхлас ĕçе панă. Йышлă çемьере ĕçе пиçĕхсе ÿснĕ вăл. Шкул пĕтерсен Канашри медицина училищинче пĕлÿ илнĕ, ăна лайăх паллăсемпе пĕтернĕ. Унтан Канаш районĕнчи Чакаç ялĕнче фельдшер пункчĕн заведующийĕнче тăрăшнă. Çемьеленсен пĕр вăхăт Тюмень облаçĕнче те ĕçлеме тÿр килнĕ ăна. Тăвай ялĕнчи тĕп больницăн хирурги уйрăмĕнче вара иртнĕ ĕмĕрхи сакăрвуннăмĕш çулсен вĕçĕнченпе: малтан медсестрара, 2002 çултанпа вара аслă медсестрара тăрăшать. Пĕрле ĕçлекенсемшĕн те, çынсен сывлăхĕшĕн те чунне парать. Ахальтен мар ăна нумаях пулмасть Чăваш Республикин сывлăх сыхлав министерствин Хисеп грамотипе наградăларĕç, çак ятпа ăна Чăваш Ен Пуçлăхĕ Михаил Игнатьев та, район ертÿçисем те саламласа ырă сăмахсем каларĕç. Лариса Михайловна мăшăрĕпе Петр Павловичпа пĕрле икĕ хĕр çуратса  ÿстернĕ, вĕсене аслă пĕлÿ парса пурнăç çулĕ çине кăларнă.