15 сентября 2017 г.
Эпир çиекен çимĕçсенчен нумайăшне холодильникре упрама юрамасть. Апат тутлă çеç мар, усăллă та пултăр тесен çак сĕнÿсене пăхăнмалла.
Енчен те эсир баклажана нумай вăхăт упрас тетĕр пулсан, анчах консервăлама май çук-тăк çаврашкан касăр та типĕтĕр. Вара çип çине тирсе кăмпана упранă евĕр упрăр.
Дыньăна ахаль чухне те холодильникре упрама сĕнмеççĕ, каснă пулсан пушшех те. Ун пеккине ывăтса ярсан тĕрĕсрех те пулать, мĕншĕн тесен вăл этилен газĕ кăларма тытăнать. Тĕпрен илсен дыня та, кавăн та, хуппи аманман пулсан, кухньăри шкапра та аван хĕл каçаççĕ, тутне уйăхĕ-уйăхĕпе упраççĕ ?кавăн çуркуннечченех/.
Кăнтăр енче ?иçĕм çырли, цитруссем/ ÿсекен çимĕçе тем тесен те холодильникре упрамалла мар. Тем пек мандарина сивĕлле çиес килсен те вăл сирĕншĕн усăллă пулмĕ. Сивĕре улма-çырла пăсăлать те сиенлĕ япаласем кăларма пуçлать. Çавăнпа та цитрус çимĕçсене шкапсене хумалла.
Олива çăвĕ холодильникре лĕкĕленсе каять, тути пăсăлать. Пыл вара сивĕре хăйĕн пахалăхне çухатать.