25 июля 2017 г.
Çулталăк пуçланнăранпа Чăваш Енре мотоциклпа, мопедпа е скутерпа çÿреме кăмăллакансемпе çыхăннă çул-йĕр çинчи инкексен шучĕ нумайланнă. Кăçалхи пĕрремĕш çур çулта кăна çакнашкал 12 тĕслĕхе шута илнĕ, вĕсенче 4 çын пурнăçĕ татăлнă тата 11-шĕ аманнă. Сурансемпе тăкаксен йывăрлăхĕсене пăхас пулсан, кăтарту 40 процентпа танлашать. Çакă Раççейринчен тата Атăлçи федераллă округринчен 4 хут пысăкрах.
Мотоциклпа, мопедпа, скутерпа, мокикпа тата квадроциклпа çÿреме кăмăллакансемпе çыхăннă çул-йĕр çинчи инкексен шутне чакарас тесех республикăра ĕнертен пуçласа çурла уйăхĕччен «Мото» ятлă профилактика рейчĕ ирттерме палăртнă. Çÿлерех асăннă транспорт хатĕрĕсемпе çÿрекенсене яланах тимлĕ пулма, шлемсем тăхăнма сĕнетпĕр, мĕншĕн тесен çул-йĕр ĕçченĕсем вăрттăн сăнав мелĕсемпе усă курма та палăртнă. Çул-йĕр çинчи йĕркене пăсакансене çирĕп явап тыттарĕç.