25 июля 2017 г.
Илья Семенович Тукташ - прозаик, поэт, куçаруçă, литературовед, фольклорист, Чăваш Республикин гимнĕн авторĕ, Тăван çĕршывăн Аслă вăрçине хутшăннă. Вăл Элĕк районĕнчи Мăн Тукташ ялĕнче çуралнă. Литература ĕçне 1927 çулта пуçăннă. Çак çулта унăн пичетре пĕрремĕш хайлавĕсем кун çути курнă. Вăл сăвăсем, юрăсем, поэмăсем, драмăсем, повеçсем, калавсем, юмахсем, легендăсем çырнă. Малтанах “Пĕрремĕш çĕнтерỹ”, “Çамрăк колхозниксем” очерксем пичетленнĕ, çаксемпе литературăна кĕнĕ. 1931 çулта “Вăкăр çырми” ятлă паллă повеç çырнă. Фольклор пухма нумай вăй хунă, чăваш фольклорĕн пуххине туса йĕркеленĕ. Шкулсем валли вĕренỹ литератури хатĕрлеме хутшăннă. Илья Семенович Тукташăн тĕп кĕнекисен шутне “Çĕр хуçисем”, “Сăвăсемпе юрăсем”, “Хĕвел”, “Вăкăр çырми”, “Пĕрремĕш çĕнтерỹ”, “Хура кушак”, “Телей чечекĕ”, “Этем çуралчĕ” тата ыттисем кĕреççĕ.