30 мая 2017 г.
Тунтикун район администрацийĕнче ял тăрăхĕсен пуçлăхĕсен ларăвĕ пулнă.
“Акатуй-2017” уява çÿллĕ шайра ирттерсе ярассишĕн тимлемелле пурин те. Июнĕн 10-мĕшĕнче ирттерĕпĕр ăна, 11 сехетре пуçланĕ”, - тенĕ район администрацийĕн пуçлăхĕ Владимир Ванерке.
Полици начальникĕн заместителĕ Борис Борисов, Тăвайри 45-мĕш номерлĕ пушар хуçалăхĕн ертÿçи Николай Павлов, социаллă аталанупа архив ĕçĕн пай ертÿçи Наталья Чайкина тухса калаçнă. АПК аталанăвĕпе экологи пайĕн начальникĕ Николай Краснов уй-хирсенче ака мĕнле иртни пирки пĕлтернĕ.
Строительство, çул-йĕр, пурăнмалли çурт-йĕрпе коммуналлă хуçалăх ĕçĕсен пайĕн начальникне Тамара Дьяконована, вĕрентÿ пайне ертсе пыракан Олег Ломоносова, организаципе контроль тата информаципе тивĕçтерекен пай начальникне Валерий Чайкина, выльăх-чĕрлĕх чирĕсемпе кĕрешекен станци начальникне Александр Шакина, Тăвайри культура çурчĕн директорне Арина Алексеевана, йĕркелÿпе хатĕрлев пайĕн заведующине Тамара Сорокинана та итленĕ пухăннисем, вĕсем харпăр хăйне шанса панă ĕçсем пирки кĕске пĕлтерÿ панă.