10 января 2017 г.
Районта çĕнĕ çулта пĕр çĕнĕ çемье хушăннă. Раштав уявĕнче Дмитрий Сергеевпа Олеся Кириллова мăшăрланни çинчен ЗАГС пайĕнче алă пусса çирĕплетнĕ. Йăлана кĕнĕ йĕркепе çамрăксене адреслă саламласа çырнине панă.
"Пĕр-пĕрне юратса та хисеплесе, пулăшса йĕркелĕр çемьери хутшăнусене. 2017 çула Чăваш Енре Амăшĕпе Ашшĕн çулталăкĕ тесе йышăннă. Ача-пăчаллă, хăвăра пăхса ỹстернĕ çынсемшĕн яланах шанчăклă тĕрек пулăр", - тенĕ унта.
Тин пĕрлешнĕ мăшăр хăнасемпе пĕрле уяв чăрăшне илемлетнĕ.
Автан çулĕн малтанхи кунĕнче районта пĕр ача çуралнă, Элпуçĕнчи Кармаенкосем хĕр пĕрчине Диана ят панă.
Т.ДМИТРИЕВА.