23 сентября 2014 г.
Иртнĕ эрнере Чăваш Ен Пуçлăхĕ Михаил Игнатьев Мускавра РФ Патшалăх Канашĕн ларăвне хутшăннă. Унта Раççей бизнесне, унăн тулашри рынокĕсенчи лару-тăрăвне тỹрремĕнех витĕм кỹрекен ыйтусене пăхса тухнă.
Ларăва уçнă май Владимир Путин Президент юлашки 10 çулта çĕр-шыв экономикинче пысăк улшăнусем пулса иртнине, предпринимательлĕх климачĕ лайăхланнине палăртнă. 16 çул калаçусем ирттернĕ хыççăн Раççей ВТОна кĕнĕ. Анчах Анăç Раççей тĕлĕшпе йышăннă юлашки санкцисем ирĕклĕ конкуренци принципĕсене пăсаççĕ, çав çĕр-шывсем ВТОн никĕс шайĕнчи принципĕсене пăрахăçланине çирĕплетеççĕ. Санкцисене хирĕç мерăсем кама та пулин явап тыттарма мар, хамăр çĕр-шыври тавар туса кăларакансене тỹрĕ кăмăллă мар конкуренцирен хỹтĕлеме йышăннă.
Çĕр-шыв ертỹçи федераци тата регионсен влаç органĕсене экономикăн чăн секторне аталантарма сĕннĕ. Çапла тума кредитсемпе усă курмалли майсене анлăлатмалла, инфратытăма аталантармалла, производство секторĕ валли квалификациллĕ специалистсем хатĕрлемелле.
Экономика аталанăвĕн министерствин ертỹçи Алексей Улюкаев вăрăм сроклă кредит ресурсĕсемсĕр производство ỹсĕмне тивĕçтерме май çуккине палăртнă. Белгород облаçĕн губернаторĕн Евгений Савченкăн шухăшĕпе Раççейĕн стратеги шайĕнчи тĕп партнерĕпе Китайпа тытакан хутшăнусене çĕнĕ шая çĕклемелле. Воронеж облаçĕн губернаторĕ Алексей Гордеев Раççей Ял хуçалăх министерстви юлашки çулсенче кивĕ фермăсене реконструкцилемелли, çĕннисене тумалли проектсене пулăшма пăрахнине аса илтернĕ. Çавна май сĕт суса илес енĕпе ĕçлекен хуçалăхсен укçа çителĕксĕр, Воронеж облаçĕнче, сăмахран, федераци бюджечĕн инвестици кредичĕсен проценчĕсене саплаштармалли парăмĕ 140 млн. тенке çитнĕ.
Чăваш Енре Раççей ВТОна кĕнĕ май шалти рынокри импорт продукцийĕн тỹпи ỹснĕ. Çав вăхăтрах çаксем тĕпрен илсен предприятисем чикĕ леш енчен пысăк технологиллĕ оборудовани кỹрсе килнипе çыхăннă. Унашкаллисен шутĕнче - "Промтрактор-Вакун", "ТУС" ХАОсем, "Хĕвел", "Керамика", "ГиПор-М", "Проектэлектротехника", "Юрма" агрохолдинг" ОООсем, "Акконд", "Букет Чувашии", "Чувашавтодор" УАОсем. Вĕсем çĕнĕ производствăсене, оборудование хута янă май импорт калăпăшĕ чакасса кĕтме пулать.
Экономика ĕç-хĕлĕн тĕсĕсене тишкерни çакна кăтартать: Чăваш Енре конкурентлă ĕç-хĕл шутĕнче - апат-çимĕç продукчĕсем туса илесси, хими, металлурги, электрооборудовани, электрон тата оптика оборудованийĕн производствисем, çавăн пекех электроэнерги туса илесси, ăна тата газ, шыв валеçесси. Конкурентлăх енĕпе вăйлах маррисем, патшалăх енчен пулăшмаллисем - пир-авăрпа çĕвĕ, машинăсемпе оборудовани, транспорт хатĕрĕсен производствисем.
Республика экспорчĕн пĕтĕмĕшле калăпăшĕнче "Химпром" УАО тỹпи 2010 çулхипе танлаштарсан пĕлтĕр 16,6-ран 28,6 процент таран ỹснĕ, "ДюпонХимпром" УАОн - 2,6-ран 6,7, Чапаев ячĕллĕ ПОн - 1,2-рен 3,5 процент таран. "Акконд" та экспорт калăпăшне ỹстерсе пырать: 2010 çулта АПШн 4620,5 пин долларĕ чухлĕ пулнă, пĕлтĕр - 5686,1 пин доллар шайĕнче.