23 сентября 2014 г.
Ĕнер йăлана кĕнĕ лару пулнă район администрацийĕн пĕчĕк залĕнче. Унта район администрацийĕн структура подразделенийĕсен, ĕç тăвакан республикăри тата федераллă органсен уйрăмĕсен, предприятисемпе организацисен ертỹçисем пухăннă.
Çĕр участокĕсен инвентаризаци комиссийĕн ларăвĕ пулать сентярĕн 24-мĕшĕнче.
Сентябрĕн 25-мĕшĕнче - çемьене çирĕплетес тата уйрăлассине сахаллатас ыйтусемпе çавра сĕтел иртет, ирхине вунă сехетре пуçланать. Çав кунах наркотикла япаласемпе усă курассине хирĕçлессипе ĕçлекен комисси членĕсем пухăнаççĕ, ку лару 14 сехетре ĕçлеме пуçлать.
Сентябрĕн 26-мĕшĕнче Енĕш Нăрвашри "Медвежий угол" турист комплексĕнче ЧР туризма аталантаракан совет канашлать. Каçхине Тăвайри пултарулăхпа кану центрĕнче А.Пăртта çырнă пьеса тăрăх лартнă "Килех килчĕ тур çырни" ятлă спектакль пулать. Ăна К.В.Иванов ячĕллĕ академи драма театрĕн артисчĕсем кăтартаççĕ.
Район администрацийĕн пуçлăхĕн пĕрремĕш çумне - АПК аталанăвĕпе экологи пайĕн начальникне Валерий Чайкина тимлĕ итлерĕç пухăннисем. Вăл Тăвай енри ял хуçалăхĕнчи ĕççипе паллаштарчĕ.
-Пирĕн тавралăха тирпей-илем кĕртес тĕллеве, кашни çын тасатас ĕçе хутшăнтăр тесе, пурнăçламалла. Вырăнти влаçăн тĕп задачисенчен пĕри ку, - терĕ Валерий Васильевич.
Нумай хваттерлĕ çуртсене харпăр хăй газпа хутса ăшăтмалла тăвассине вĕçлемелле ку эрнере.
Вĕрентỹ пайĕн начальникĕ Олег Ломоносов шкулчченхи учрежденисенче, хушма пĕлỹ паракан центрта хутмалли сезона хатĕрленсе юлашки ĕçсене тунипе паллаштарчĕ.
Полицин районти уйрăмĕн начальникĕ Вениамин Обаськин, Тăвайри больницăн тĕп врачĕ Нина Бурдасова, надзор ĕçĕсен пайĕн инспекторĕ Аркадий Фролов тухса калаçрĕç.
"Нумай функциллĕ центр" автономиллĕ учреждени директорĕн Николай Перцевăн информацийĕ те интереслĕ. Паянхи куна нумай функциллĕ центр пурĕ 874 хутчен пулăшнă, вĕсенчен 390 тĕслĕхĕнче консультаци панă, 484-шĕнче заявлени йышăннă. Тăрмăш, Çĕнĕ Пуянкасси, Элпуç ял тăрăхĕсенче пурăнакансем активлăрах пулнă.
Г.ЕГОРОВА.