23 сентября 2014 г.
Паянхи пурнăç хăвăртлăхне тата условийĕсене кура килте автомобиль пурри нимпе улăштарайми пулăшакан пулса тăрать. Унпа çỹрекенĕн, паллах, водитель удостоверенийĕ пулмалла, вăл çухалас-тăвас пулсан, машинăна килтен чĕртсе тухма юрамасть. Правасăр юлсан çул çине машинăпа тухни те çул-йĕр куçăмĕн правилисене сĕмсĕррĕн пăсни пулса тăрать. Водитель правине туртса илни вара чи çирĕп наказанисенчен пĕри шутланать.
Апла пулин те пурнăç çакна кăтартса парать: правасăр юлнă водительсем, çапла тума юрамасан та, каллех автомобиль рулĕ умне лараççĕ, çул çине тухаççĕ, çийĕнчен татах йывăр çул-йĕрпе транспорт инкекĕсем тăваççĕ. Нумайăшĕ çавăншăн тивĕçлĕ наказани илсен те, хăйĕн айăпне кирлĕ пек туйса илме тăрăшмасть, обществăшăн хăрушлăх кăларса тăратнине тарăннăн ăнланса илмест. Çавна пула саккуна та çăмăллăнах пăсаççĕ.
Акă, çапла, 2014 çулхи августăн 20-мĕшĕнче каçпа сакăр сехет те 25 минутра Тăвай районĕнчи "Аниш" автоçул çинче водитель ВАЗ-2109 автомобиле ỹсĕрпе тытса пынăскер, ВАЗ-2112 автомобильпе хирĕç çапăннă, ВАЗ-2112 автомобилĕн водителĕ больницăн реанимаци уйрăмĕнче вилсе кайнă, çапăнтарнă водитель хăй те йывăр аманса больницăна лекнĕ. Асăннă çул-йĕрпе транспорт инкекне тĕпчесе тишкерни çакна кăтартса панă: ВАЗ-2109 автомобиль водительне транспорт хатĕрне тытса пымалли правасăр хăварнă пулнă, мĕншĕн тесен 2014 çулхи февральте ун пирки РФ КоАПăн 1 пайĕн 12.26 статйипе административлă протокол (вăл ỹсĕррипе ỹсĕр маррине медицина тĕлĕшĕнчен тĕрĕслесе пĕлме ыйтнине пурнăç) çырнă пулнă.
Çапла водитель прависĕр юлсан та, айăпа кĕнĕ водительсем тивĕçлĕ выводсем тумаççĕ, татах çул-йĕр куçăмĕн правилисене пăсаççĕ. Асăннă гражданин шăпине тата ăна мĕнле наказани парассине малалла суд татса парĕ, тен, вăл чылай çирĕпрех те пулĕ. Анчах ăна пула татăлнă çын пурнăçне каялла тавăраймăн-çке.
Хăйĕн йăнăшĕсене шута илмен тепĕр йĕркесĕр водитель маларах çеç - 2014 çулхи августăн 13-мĕшĕнче машинине тытса пыраймасăр унпа çул çинчен кювета çаврăнса ỹкнĕ, хăйне больницăна илсе çитернĕ. Çул-йĕрпе транспорт инкекне тĕрĕслени асăннă машина водителĕ пирки 2014 çулхи июнĕн 13-мĕшĕнче административлă протокол çырнă пулнă, ăна РФ КоАПăн 1 пайĕн 12.8 статйипе (водитель транспорт хатĕрне ỹсĕрле тытса пынăшăн) суда тăратнă.
Тепĕр тĕслĕх. 2014 çулхи майăн 21-мĕшĕнче автомашинăна ỹсĕрле кирлĕ пек тытса пыраймасăр çул çинчен тухса транспорт хатĕрĕпе кювета çаврăнса ỹкнĕ. Водительпе пассажира больницăна илсе çитернĕ.
Пĕр енчен, çул-йĕрпе транспорт правилисене пăснăшăн çирĕпрех наказани парас тĕллевпе 2013 çулта вăя кĕнĕ тĕп улшăнусенчен пĕринпе килĕшỹллĕн Госавтоинспекци сотрудникĕсем водительсенчен çул çинчех правана илме пултараймаççĕ, водитель удостоверенийĕ суд йышăнăвĕ ăна илес, правасăр хăварас пирки саккунлă вăя кĕричченех водительре юлать. Тепĕр енчен, водительсем çакăнпа усă курса, çул-йĕр куçăмĕн правилисене сĕмсĕррĕн пăссах, суд йышăнăвне кĕтсе, çул куçăмĕн ытти участникĕсемшĕн хăрушлăх кăларса тăратма пултарсах, пĕр чăрмавсăр çулсем çинче автомашинăпа çỹреççĕ.
Шанас килет, ăнлануллă водительсем, вăхăтлăха транспорт хатĕрĕсемпе çỹреме чарнисем, статьяра кăтартнă тĕслĕхсемпе шухăшсене тĕпе хурса, текех нихăçан та çул-йĕр правилисене пăсмĕç. Госавтоинспекци сотрудникĕсем те профилактика тĕлĕшпе çитменлĕхсене палăртма рейдсем ирттерĕç. 2014 çулхи сентябрĕн 25-27-мĕшĕсенче вара Тăвай районĕн территорийĕнче "Ỹсĕр водитель" профилактика мероприятийĕ иртĕ.
И.СКВОРЦОВА, ГИБДД инспекторĕ, полицин аслă лейтенанчĕ.