23 сентября 2014 г.
Енĕш Нăрвашри шкул çулне çитмен учрежденире ачасен сывлăхне çирĕплетме, тивĕçлĕ воспитани парса вĕрентме тăрăшаççĕ.
Анчах та мĕн те пулсан тăвас тени укçа-тенкĕсĕр ниепле те майлашăнмасть. "Кермен" ача-пăча садне ку енĕпе "Упа кĕтесĕ" база ертỹçи Сергей Николаевич Дмитриев хăйĕн пулăшăвне сĕнет. Вăл ачасене уçă сывлăшра канмалли эрешлĕ беседка, юмахри пек хитре "пỹрт", йывăçран ăсталанă тараса, урлă каçса çỹремелли кĕпер (сăн ỹкерчĕкре) парнелерĕ. Çавăн пекех вылямалли верандăсенчи кивĕ урай хăмисене улăштарма çĕннисем илсе килсе пачĕ.
"Ача-пăча сачĕ малашне те чечеклентĕр, ешертĕр", - терĕ ырă кăмăллă предприниматель.
Çав ĕçсене пурнăçлама тата ытти вак-тĕвексене юсама Нина почтальонка ывăлĕ Руслан Сергеевич Михайлов пулăшрĕ. Владимир Петрович Михайлов та нумай вăй хучĕ. Вĕсен ăста аллисене коллектив ылтăнпа танлаштарчĕ.
Эпир, ача-пăча садĕнче ĕçлекенсем, ял хастарĕсене питĕ пысăк тав сăмахĕ каласшăн. Вĕсене çемьере, ĕçре, кулленхи пурнăçра пысăк çитĕнỹсем, ырлăх-сывлăх, телей сунатпăр. Ашшĕ-амăшĕ малашне те ачасене воспитани парас ĕçре пире пулăшса пырасса шанатпăр. Пĕрле килĕштерсе ĕçлесен ăнăçусем пулаççех.
Ача-пăча садĕнче ĕçлекенсем. Енĕш Нăрваш ялĕ.