23 сентября 2014 г.
Вера Михайловна Бурлакова хăй вăхăтĕнче Мучарти шкулăн интернатĕнче каçхи няньăра ĕçленĕ. Ун чухнехи вĕрентекенсемпе вĕренекенсем ырăпа аса илеççĕ ун пирки, ĕçшĕн чунне панине палăртаççĕ. Халĕ çамрăк мар ĕнтĕ вăл, çитменнине, пурнăçĕнче пĕччен. Çавăнпа вăл Кушкăри ваттисен çуртĕнче пурăнма кăмăл тунă.
Çак кунсенче вара Вера Михайловнан паллă юбилей пулчĕ, вăл 80 çул тултарчĕ. Ăна çак ятпа саламлама тата ырă сунма иртнĕ эрнере Кушкăри ватăсен çуртне Мучарти шкултан шкул автобусĕпех пырса çитрĕç. Юбиляра саламлама шкул директорĕ Венера Ивановна Смирнова, Наталия Геннадьевна Ахтимирова, Елена Геннадьевна Бахмутова, Ольга Валерьевна Жаркова вĕрентекенсем пынă. Вĕсем ăшă сăмахсем каларĕç, çирĕп сывлăхпа вăрăм кун-çул сунчĕç Вера Михайловнана. Долина Михайловна Бурлакова вĕрентекен ертсе пынипе виççĕмĕшпе тăваттăмĕш классенче вĕренекенсем пĕрле концерт лартса пачĕç. Ваттисен çуртĕнче пурăнакансем питĕ тав турĕç вĕсене. Саккăрмĕш класра вĕренекенсем Анжела Косовапа Надежда Родина концерта маттур ертсе пычĕç, пурне те хавхалантарма пултарчĕç.
Валентина Бадановапа Наталия Кириллова пысăк кукăль пĕçерсе хатĕрленĕ, унпа хăналарĕç. Тортне те илнĕ ятарласа. Юбиляра çавăн пекех чечек çыххисем пачĕç нумай çул пурăнма ырă сунса. Ватăсен çуртĕнче пурăнакансене те хăйсене çапла ăшшăн кĕтсе илсе ăсатса янăшăн тав турĕç Мучар шкулĕнчен пынисем, вĕсен хăтлăхне, тараватлăхне уйрăммăн палăртрĕç.
В.ЛАВРОВА. Мучар ялĕ.