19 сентября 2014 г.
Вăрман отраслĕн хисеплĕ ĕçченĕсем тата ветеранĕсем!
Сире професси уявĕ ячĕпе саламлатăп!
Вăрман пуянлăхне сыхласси, унпа вырăнлă усă курса ăна ỹстерсе пырасси, халăхăн экологи культурине йĕркелесси - Чăваш Республикин патшалăх политикин чи пĕлтерĕшлĕ çул-йĕрĕсем.
Пурнăçа питĕ лайăх пĕлнĕ пирĕн мăн асаттемĕрсем: "Вăрман пек пуянни çук",_ тесе каланă. Паян Чăваш Енре хальхи йышши вăрман пушар службине туса хунине, унăн пурлăхпа техника никĕсне палăрмаллах çирĕплетнине тата пушар тухас хăрушлăх уйрăмах пысăк тапхăрсене лайăх хатĕрленсе кĕтсе илнине пула вăрмансене пушар хăрушсăрлăхĕпе тивĕçтересси çỹллĕ шайра пурнăçланать. 2010 çулхи пушарсем кỹнĕ сиене пĕтерес тĕлĕшпе пысăк ĕç туса ирттернĕ. 5561 гектар (83,5 процент) йышăнакан çунăк вăрмансене тасатса йĕркене кĕртнĕ, 2268 гектарпа (34 процент) танлашакан лаптăк çинчи вăрмана çĕнетнĕ. Вăрмансене чĕртсе тăратассипе çыхăннă ĕçе малалла та туса пырăпăр.
Иртнĕ чылай çул хушшинче 2013 çулта пуçласа республика бюджетĕнче вăрман хуçалăхне пахалăхлăн тытса пыма укçа-тенкĕ пăхса хăварнă, çакă вăрман фончĕпе тухăçлăн тата вырăнлă усă курма май парать. 2013 çулта вăрман хуçалăхне тытса пырассипе çыхăннă ĕçсене пĕтĕмĕшпе 89,6 пин гектар лаптăкпа танлашакан вăрман фончĕн çĕрĕсем çинче виçĕ лесничествăра туса ирттернĕ. 2014 çулта асăннă ĕçсем пĕтĕмĕшпе 214,9 пин гектар лаптăк çинче тата виçĕ лесничество чиккисенче пурнăçланаççĕ. Пĕтĕмĕшпе илсен, икĕ çулта Чăваш Енри вăрман фончĕн пĕтĕм лаптăкĕн çурринчен ытларах пайĕнче вăрман хуçалăхне тытса пырассипе çыхăннă ĕçсене туса ирттермелле. Çавна май халăх пурлăхĕпе усă курнине кирлĕ пек шута илсе пырассине тата тĕрĕслесе тăрассине тивĕçтермелли майсем йĕркеленеççĕ.
Çакна палăртма кăмăллă: çут çанталăк еткерне сыхласа упрас ĕçе вăрман хуçалăхĕн специалисчĕсем кăна мар, общество организацийĕсемпе граждансем те пысăк тỹпе хываççĕ. Йывăç лартас, вăрмансене çỹп-çапран тасатас тĕлĕшпе ирĕклĕ йĕркепе ирттерекен акцисене çынсем çулсерен ытларах та ытларах хутшăнаççĕ.
Вăрмансене сыхласа упрассипе, Чăваш Енри çут çанталăк пуянлăхĕсене ỹстерсе пырассипе çыхăннă пысăк пĕлтерĕшлĕ ĕçе малалла та пурнăçламалла. Çакна хăйсен ĕçне чунтан парăннă çынсем кăна тума пултараççĕ.
Ырми-канми тăрăшса пурнăçлакан пархатарлă ĕçĕршĕн чунтан тав тунине йышăнсамăр! Сиртен кашнинех телейпе ăнăçу тата ырлăх сунатăп!
Чăваш Республикин Пуçлăхĕ М.ИГНАТЬЕВ.