19 сентября 2014 г.
Кашни уйăхра пĕр хутчен районсенче Пĕрлехи информаци кунне ирттересси йăлана кĕнĕ пирĕн республикăра. "Раççей - спорт патшалăхĕ" Пĕтĕм тĕнчери спортăн V форумне хатĕрленесси мĕнле пыни, ЧР таварсен рынокне шайлаштарассипе йĕркелемелли мерăсем, "ЧР халăх пурнăçĕн пахалăхне ỹстермелли тата сывлăхне çирĕплетмелли хушма мерăсем пирки" ЧР Пуçлăхĕн Указне мĕнле пурнăçласа пыни çинчен сỹтсе явнă. Çавăн пекех вырма мĕнле пыни, пушар хăрушсăрлăхĕн правилисене епле пăхăнни пирки те сăмах хускатнă.
Района информаци кунне ирттерме Чăваш Патшалăх Канашĕн депутачĕ, "Акконд" обществăн генеральнăй директорĕ Валерий Иванов, РФ пенси фончĕн Чăваш Енри уйрăмĕн управляющине пулăшакан Валерий Николаев, "Чăваш наци музейĕ" ЧР бюджет учрежденийĕн директорĕ Ирина Меньшикова килнĕ Шупашкартан.
Информушкăн хăйĕн ĕçне район администрацийĕн пуçлăхĕпе Владимир Ванеркепе тĕл пулнинчен пуçланă. Район администрацийĕн пĕчĕк залĕнче асăннă çĕрте ĕçлекенсемпе калаçу малалла пынă.
Валерий Иванов ертсе пыракан ушкăн "Чутеевский" ЯХПК ĕçченĕсемпе, ялти вăтам шкул работникĕсемпе тĕл пулса, çỹлерех асăннă темăсемпе калаçу пуçарнă. "Ял хуçалăх продукцине (аш-какайпа сĕт) туса илессин калăпăшне ỹстерес тесен мăйракаллă шултра выльăхсен йышне упраса хăвармалла е вĕсене нумайлатса пымалла. Çакна тума паллах выльăх апачĕ чылай кирлĕ. Ку енĕпе Тăвай районĕнчи выльăх-чĕрлĕх пăхакансем начар мар тăрăшаççĕ. Вĕсене пирĕн хавхалантарсах пымалла", - тесе вĕçлерĕ сăмахне Валерий Николаевич.
РФ Пенси фончĕн Чăваш Енри уйрăмĕн управляющин çумĕ Валерий Николаев, "Чăваш наци музейĕ" ЧР бюджет учрежденийĕн директорĕ Ирина Меньшикова тата район администрацийĕн вĕрентỹ пайĕн начальникĕ Олег Ломоносов Йăнтăрчăри вăтам шкулти тĕпрен юсанă хыççăнхи спортзала уçнă çĕре хутшăнчĕç. "Шупашкарта октябрĕн 9_11-мĕшĕсенче "Раççей - спорт патшалăхĕ" Пĕтĕм тĕнчери спорт форумĕ пулать. Çавăнпа республикăра ăна ирттерме тĕплĕн хатĕрленеççĕ. Сирĕн шкулта юсанă спортзала çак кунсенче уçни те унпа çыхăннă, тесен те йăнăш мар. "Единая Россия" партин "Ача-пăча спорчĕ" проектне пурнăçа кĕртсе уйăрнă укçа-тенкĕпе юсанă спортзала. Сире лайăх вĕренме хавхалантартăр вăл, хаклă ачасем. Физкультурăпа спортра лайăх çитĕнỹсем тума пулăштăр", - терĕç вĕренекенсен уявне хутшăннă хăнасем.
Çакăн хыççăн, 14 сехетре, Шупашкартан килнисем граждансене харпăр хăй ыйтăвĕсемпе йышăннă.
Г.ЕГОРОВА.
Сăн ỹкерчĕкре: Чăваш Республикин Патшалăх Канашĕн депутачĕ В.Н.Иванов граждансене йышăннă вăхăтра.