12 сентября 2014 г.
"Раççей - спорт патшалăхĕ" форума тата Раççей Президенчĕ çумĕнчи физкультурăпа спорта аталантарассипе ĕçлекен Канашăн ларăвне хатĕрленсе ирттерес енĕпе ĕçлекен республикăри йĕркелỹ комитечĕн черетлĕ ларăвĕ пулнă.
"Раççей - спорт патшалăхĕ" Пĕтĕм тĕнчери спорт форумĕн ĕçлĕ программипе тата ăсталăх сехечĕсене Чăваш Енрен хутшăнакан спортпа педагогика общественноçĕ пирки ЧР физкультурăпа спорт министрĕ С.Мельников пĕлтернĕ.
Спорт форумĕ иртнĕ кунсенче шурă халатлисем те сыхă тăрĕç, вăхăтра медицина пулăшăвĕ парĕç. Çакăн пирки ЧР Министрсен Кабинечĕн Председателĕн çумĕ - ЧР сывлăх сыхлавĕн тата социаллă аталану министрĕ А.Самойлова сăмах хускатнă.
Шупашкар хула администрацийĕн пуçлăхĕ А.Ладыков спорт форумĕ вăхăтĕнче Пĕтĕм тĕнчери хăвăрт утакансен кунне тата спортсменсен парадне йĕркелесси пирки пĕлтернĕ.
Чăваш Ен Пуçлăхĕ Михаил Игнатьев хăйсен çурчĕсенче пурăнакан çемьесене паллă спортсменсемпе пĕрле ирхи зарядкăна тухма чĕнсе каланă.
"Автомобильсĕр кун" акци йĕркелесшĕн. Юпа уйăхĕн 9-мĕшĕнче хулара пурăнакансем ĕçе общество транспорчĕпе тата çуран çитме пултарĕç. Сывă пурнăç йĕркине пăхăнакансене спорт форумĕ иртнĕ кунсенче ĕçе те, уява та спорт тумĕпе кайма сĕнеççĕ.
ЧР Суту-илỹпе промышленноç палатин президенчĕ И.Кустарин тĕп хулара "Хальхи спорт. Çĕнĕлĕхсемпе малашлăх" спорт индустринчи çитĕнỹсен куравне йĕркелесе ирттерессипе паллаштарнă. Выставка Республика тỹремĕнчи 2-мĕш павильонра уçăлĕ. ЧР информаци политикин тата массăллă коммуникацисен министрĕ В.Андреева пĕлтернĕ тăрăх, унта кĕнекесен куравне те йĕркелеме палăртаççĕ.
Çĕнĕ Шупашкар хула администрацийĕн пуçлăхĕ А.Сироткин Хула кунĕнче (авăнăн 20-мĕшĕ) футбол уйĕ уçăлассине пĕлтернĕ.
"Раççей - спорт патшалăхĕ" Пĕтĕм тĕнчери спорт форумĕ Шупашкарта октябрĕн 9-11-мĕшĕсенче пулнине тепĕр хут аса илтеретпĕр.
И.РОМАНОВ.