12 сентября 2014 г.
Çак кунсенче Кармалта пурăнакан Нонна Александровна Николаева 90 çул тултарнă. Сумлă ветерана саламлама районтан та хăнасем килсе çитнĕ.
Малтанах ял тăрăхĕн пуçлăхĕ Геннадий Иванов тыл ĕçченĕн пурнăç çулĕпе паллаштарнă. Вăрçă вăхăтĕнче хастар ĕçленĕшĕн медаль парса чысланă ăна.
Район администрацийĕн пуçлăхĕ Владимир Ванерке, АПК аталанăвĕпе экологи пайĕн начальникĕ Валерий Чайкин, ветерансен районти канашĕн председателĕ Римма Гурина кинемине çирĕп сывлăх, вăрăм ĕмĕр, телей суннă, асăнмалăх парне панă.
Раççей Президентĕнчен Владимир Владимирович Путинран хăйне юбилей ячĕпе янă çырăвне вуласан куçĕсем шывланчĕç ветеранăн. "Кĕтменлĕх тата хаклă парне вырăнне пулчĕ ку маншăн. Тавах пирĕн пек ватăсене манманшăн, тимлĕх уйăрнăшăн, ырă суннăшăн. Хăвăр та сывлăхпа çỹрĕр", - тенĕ Нонна Александровна хăнасене ăсатнă май.
Р.ШУМОВА.