12 сентября 2014 г.
Тăвайри автостанципе юнашар, Çăлпуç еннелле каякан çул хĕрринче темиçе уйăх каялла çынсем ĕçлеме пуçларĕç.
"Мĕн пулать кунта?" - тесе кăсăкланаттăм тăтăшах.
"Автозаправка", - тесе хуравлатчĕç тар кăларакансем кĕскен.
Нумай та вăхăт иртмерĕ, иртнĕ эрнере вăл транспорт хуçисене тивĕçтерме тытăнчĕ те. "Токо" ят панă ăна, "Лама" обществăн тепĕр объекчĕ иккен вăл. Çавнашкал станци Йĕпреçре тата ытти çĕрте те уçăлнă.
-Район центрне талăкра çĕр-çĕр çын килсе каять. Вĕсене пирĕн станци хăй еннелле йыхăртăр, водительсен кăмăлне çĕклетĕр тесе тăрăшрĕç строительсем, - тет обществăн генеральнăй директорĕ Николай Миллин.
Кунтах касса çурчĕ тата ытти объектсемпе оборудованисем вырăн тупрĕç, çулне асфальт сарса якатрĕç, территорие тирпей-илем кỹчĕç.
Тăвайри Михаил Архангел ячĕллĕ чиркỹн иерейĕ Николай атте станцине сăвапларĕ, унăн ĕмĕрне вăрăмлатма пулăшакан кĕлĕ вуларĕ.
Станцие савăнăçлă лару-тăрура уçрĕç. Унта район администрацийĕн пуçлăхĕ Владимир Ванерке, "Лама" обществăн ертỹçисем, клиентсем тата хăнасем хутшăнчĕç. Чылайăшĕ сăмах каларĕ.
-Эпир харăсах виçĕ мулкач тытасшăн. Конкуренцие тĕпе хурса çынсене яланах лайăх шайра тивĕçтересшĕн, илсе килекен продукт пахалăхлă пултăр тесе тимлесшĕн. Пилĕк çын валли ĕç вырăнĕ турăмăр. Вырăнти бюджета налог тỹлеме пуçлатпăр. Тăвайсем пирĕн ĕçе кăмăлласа йышăнасса шанатпăр, - пĕлтерчĕ "Лама" обществăн генеральнăй директорĕ Николай Миллин. Владимир Алексеевич çĕнĕ коллектива районта пурăнакансемпе, алла-аллăн тытăнса, ĕçлеме сунчĕ.
-Клиентсен йышĕ куллен нумайланса пытăр, - терĕ район администрацийĕн пуçлăхĕн çумĕ, АПК аталанăвĕпе экологи пайĕн начальникĕ Валерий Чайкин.
Хĕрлĕ хăйăва касрĕç çакăн хыççăн.
"ТАИФ-НК", "Роснефть", "Газпром" обществăсен завочĕсенчен илсе килеççĕ продуктсене "Токо" системăн автозаправкисем. Бензин тата çунтармалли-сĕрмелли ытти материалсен хакĕсем "çыртмаççĕ", вĕсен пахалăхĕсем пирки те иккĕленмелле мар. "Токо" станци - паянхи кунпа килĕшỹллĕ, нумай функцильлĕ предприяти. Туслă коллектив тĕрлĕ транспорт хуçисене хăйсен ĕçĕпе паллашма чĕнет.
-Çĕнĕ станци услугисемпе хавхаланса усă курма пултаратăр. Хисеплĕ водительсем, асăрхамасăр иртсе ан кайăр. Эпир сире хапăлласах кĕтетпĕр, - теççĕ транспортсен рулĕ умне ларнисене тивĕçтерекенсем, "Токо" автозаправка станцийĕнчисем.
С.ВАСИЛЬЕВА.
Сăн ỹкерчĕкре: автозаправка станцийĕнче