12 сентября 2014 г.
Кĕнекен пĕлтерĕшĕ пысăк. Вăл ăс пухма, тавракурăма тĕрлĕ енлĕ аталантарма пулăшать, "чун çимĕçĕпе" тивĕçтерет.
Паянхи куна Тĕмерти библиотека фондĕнче 11057 кĕнеке упранать. Вун пĕр тĕрлĕ хаçат-журнал килсе тăрать. Вулавăш тĕрлĕ ỹсĕмри çынсене илĕртет. Çавна май тематика каçĕсем, литература куравĕсем, ирттерме тăрăшатпăр.
"Эпир сывă пурнăçшăн" акцие хутшăнса наркомание, ытти сиенлĕ йăласене хирĕçлекен калаçу-курав йĕркелерĕмĕр. Çавна май ачасем ыйтусем çине туллин хуравларĕç. "Хăрушă чирсене" сивлерĕç.
Шкул ачисем кĕнеке тĕнчипе никамран та çывăхрах. Кунта тĕрлĕ предметсемпе килти ĕçсене пурнăçлама пулăшакан, программăпа вуламалли материал чылай-çке. Унсăр пуçне халĕ компьютер та пур. Библиотека çумĕнче йĕркеленĕ пуканесен театрĕнче те вĕренекенсем пуçарулăх кăтартаççĕ.
Тивĕçлĕ канури çынсем те кăмăлласа çỹреççĕ. Сăмахран, В.Хумышев, Ю.Воробьев, З. Яцыкова, Л.Воробьева, Ю.Чумышева, Д.Горбунова, Н. Иванов тата ыттисем те. Тĕрлĕ çĕрте ĕçлекенсенчен Н.Яковлевана, В.Прокопьевана, И.Большована, Е.Лисована, В.Андриянова, В.Козлована палăртмалла.
Чăвашла çырнă илемлĕ литературăна уйрăмах хапăл ял çыннисем. Вĕсем сахал пулнипе кĕнекесем çỹлĕксем çинче выртмаççĕ, алăран алла куçса вуланаççĕ.
Культура çулталăкĕ пулнă май, библиотекăра "Чăвашсен паллă çыннисем" куравпа интересленсе паллашаççĕ. Ăна çĕнетсех тăратпăр. Çакă та илĕртет кунта çỹрекенсене.
"Кĕнекене уçатăп - тĕнчепе паллашатăп" курав та кăсăклă пулчĕ вулама юратакансемшĕн. Вăл çут çанталăк, ытти пулăмсемпе паллаштарать, чĕр чунсен, ỹсен-тăрансен тĕнчине илсе çитерет.
Кĕнеке хăйĕн вăйне çухатман. Ахальтен пĕлỹ çăлкуçĕ, тесе каламан ун пирки. Пирĕн ĕç çынсене пулăшни, усă кỹни кăмăла çĕклет, чуна савăнтарать.
Г.ИВАНОВА, библиотекарь.
Сăн ỹкерчĕкре: Юрий Воробьев çĕнĕ кĕнекепе паллашасшăн.