12 сентября 2014 г.
Çĕнĕ вĕренỹ çулĕ пуçланчĕ. Çул-йĕр çинчи хăрушлăх ỹсрĕ çавна май. Шкула кăçал кайма пуçланисем те хутшăнаççĕ халь çуран çỹрекенсен йышне. Çавăнпа тĕрлĕ транспорт рулĕ умне ларакан водительсен питĕ тимлĕ пулмалла, ниçта та васкама кирлĕ мар.
"Майĕпен каятăн, аяккарах пулатăн", - тесе ахальтен каламан ватăсем. Уйрăмах шкул умĕпе иртнĕ чухне асăрханмалла. Акă, Тăвай ялĕнчи кивĕ шкул çывăхĕнчи асфальтлă çул урлă кирек хăш самантра та ачасем каçма пултараççĕ. Вĕсем ача-пăча творчествине аталантаракан центра, "Ача-пăча тĕнчи" комплекса, шкула каяççĕ е таврăнма пултараççĕ. Водительсем, хамăрăн пуласлăхăн, çамрăксен пурнăçне хăрушлăха кĕртсе ан ỹкерĕр, асăннă вырăнтан асăрханса иртĕр.
Ашшĕ-амăшĕсемпе вĕрентекенсен "Çул-йĕр азбуки" программăпа паллаштарма манмалла мар ывăл-хĕрĕсемпе вĕренекенсене. Çул-йĕр правилисем асра юлччăр тесен, асăннă ĕçе вăйă вылянă пек йĕркелесен аван. Калăпăр, "светофор" сăмах мĕне пĕлтерет? Мĕншĕн хĕрлĕ, сарă, симĕс тĕссене суйласа илнĕ тата ытти çавнашкал ыйтусемпе викторина ирттермелле. Асфальт çинче ỹкерчĕксен конкурсне йĕркелесен аван. Лайăх, илемлĕ ỹкерекенсене хавхалантармалла пылак çимĕçпе тата ытти те. Çул-йĕр азбукине пĕлекен ачасем хăйсен пурнăçне хăрушлăха кĕртсе ỹкермĕç.
И.СКВОРЦОВА,ГИБДД уйрăмĕн сотрудникĕ.