12 сентября 2014 г.
Çĕнçырма ялĕнче пурăнакан Ираида Ипатьевна Иванова кỹршĕллĕ Вăрмар районĕнчи Арапуç ялĕнче çуралса ỹснĕ. Ыттисем пекех çамрăкла шкула чупнă ăс пухма. Унтан Вăрнарти ял хуçалăх техникумĕнче пĕлỹ илнĕ, ветеринари фельдшерне вĕреннĕ. Çак професси ĕмĕрлĕхе килĕшнĕ хĕре. Ахальтен мар ĕнтĕ Хусанти Н.Э.Бауман ячĕпе хисепленекен ветеринари институтне кайса кĕнĕ.
Халĕ унтанпа чылай вăхăт иртнĕ. Çĕнçырмара мăшăр тупса тĕпленнĕскер, вырăнти ял хуçалăх предприятийĕсенчи тата тăватă ялти кил хуçалăхсенчи вылăх-чĕрлĕхе сиплесе пурăннă. Яланах профилактика ĕçне мала хунă вăл. Юлашки 20 çул ĕнтĕ Элпуçĕнчи ветучасток заведующийĕ. Ку вара - хăех пысăк яваплăх: чирлесрен сыхлать выльăхсене, нăйкăшнисене çийĕнчех сиплеме тăрăшать, чир-чĕре сарăлма памасть. Тивĕçлĕхĕ нумай ветучасток заведующийĕн. Унсăр пуçне темиçе çул хушши ĕнтĕ таврари ялсенчи ĕнесемпе пушмак пăрусене искусственнăй майпа пĕтĕлентерес ĕçе ăнăçлă пурнăçласа пырать. Ку енĕпе районти ăмăртусенче те пĕрре çеç мар палăрнă вăл.
Районти спорт мероприятийĕсенче те тăтăшах малтисен шутĕнче курма пулать ăна. Çавăн пек хастар та çирĕп тĕллевлĕ çын вăл Ираида Ипатьевна. Таврари халăх ахальтен мар кăмăллать ăна.
Ачисем те хăй пекех маттур. Ывăлĕпе хĕрĕ иккĕшĕ те аслă шкул пĕтернĕ. Иккĕшĕ те полицинче ĕçлеççĕ. Хĕрĕ халь тепĕр аслă пĕлỹ те илме ĕмĕтленет, юридика енĕпе вĕренет.
И.ГЛАДКОВ.