09 сентября 2014 г.
"Аль" спорткомплекс стадионĕнче СССР летчик-космонавтне, икĕ хутчен Совет Союзĕн Геройне Андриян Григорьевич Николаева асăнса районти çăмăл атлетсен республикăри 76-мĕш эстафета чупăвĕ пулчĕ. "Советская Чувашия" тата "Ял ĕçченĕ" хаçатсен призĕсене илессишĕн тупăшрĕç спортсменсем.
Стартсем умĕн вĕсене район администрацийĕн пуçлăхĕ В.Ванерке саламларĕ. Ăнăçусем, пысăк хавхалану сунчĕ. В.Кузнецов тĕп судья ăмăртусен йĕркипе паллаштарчĕ.
Тăххăрмĕш класс таран вĕренекенсем малтан тухрĕç дистанцие. Кунта Мучарти вăтам шкултисем пĕрремĕш пулчĕç. Иккĕмĕшпе виççĕмĕш вырăнсене тăвайсемпе йăнтăрчăсем пайларĕç.
Вуннă тата вун пĕрмĕш классенче пĕлỹ пухакансем те чылайăн чупрĕç. Ку ỹсĕмре вара Тăвайри вăтам шкул команди хăйĕнчен никама та ирттермерĕ. Иккĕмĕш картлашка çине - Тĕмерти вăтам, виççĕмĕш çине Чутейри вăтам шкул ушкăнĕсем улăхрĕç.
Вĕрентекенсем хушшинче те тупăшу хĕрỹ пулчĕ. Пĕри тепринчен маттуртарах чупрĕç шкулсенче ĕçлекенсем. Кунта каллех район центрĕнчи шкул команди палăрчĕ, тăвайсем чи малтан вĕçлерĕç дистанцие. Çĕнĕ Пуянкасси шкул команди - иккĕмĕш, Элпуçĕнчи вăтам шкул ушкăнĕ виççĕмĕш вырăнсене тухрĕç.
Районти ял тăрăхĕсенчен вара пиллĕкĕшĕ кăна кăмăл тунă чупма. Кунта пуянкассисем, йăнтăрчăсем, тушкилсем малти виçĕ вырăна тухрĕç.
Предприятисемпе организацисен ушкăнĕнче кăçал районти выльăх-чĕрлĕх чирĕсемпе кĕрешекен станцире вăй хуракансем çĕнтерчĕç. Халăхăн социаллă тивĕçтерỹ центрĕн туслă команди пĕлтĕрхи пекех пĕрремĕш картлашка çине тăма чылай тăрăшрĕ. Хальхинче вĕсем иккĕмĕш вырăна юлчĕç. Виççĕмĕшĕнче-"Тăвайри кооператив" потребобщество. Ывăнма пĕлмен кооператорсем хăйсен тивĕçĕсене те аван шайра туса пыраççĕ, спортра та харсăрлăх кăтартаççĕ.
Район администрацийĕн управленийĕсемпе пайĕсен командисем те ырă тĕслĕх кăтартрĕç. Кунта вĕрентỹ пайĕнче тăрăшакансене çитекенни пулмарĕ. Йĕркелỹпе тĕрĕслев ĕçĕн тата информаци тивĕçтерĕвĕ пай ушкăнĕ хальхинче маттуртарах чупрĕ, пĕлтĕр вĕсен виççĕмĕш кăтарту кăна пулнăччĕ. Экономикăпа пурлăх хутшăнăвĕсен пайĕн спортсменĕсем виççĕмĕш вырăна тухрĕç.
Çĕнтерỹçĕ командăсене пурне те дипломсемпе тата кубоксемпе наградăланă. "Ял ĕçченĕ" хаçат редакцийĕ вăтам шкулсен çĕнтерỹçисене грамотăпа хавхалантарнă, 2015 çулхи пĕрремĕш çур çулшăн хаçат çырăнса парать.
Мала тухнă командăсем республикăра хỹтĕлĕç район чысне.
В.ПАВЛОВ.