09 сентября 2014 г.
Хамăр районти Нỹшкасси ялĕнче çут тĕнчене килнĕ паллă чăваш çыравçине Илле Ефимович Тăхтине халалласа Чăваш патшалăх гуманитари ăслăлăхĕсен институчĕн литературăпа фольклористика пайĕ Элпуçĕнчи вăтам шкулта анлă лару ирттерчĕ.
Ăна "Илле Тăхтин чăваш литературинчи вырăнĕ" ятпа писатель çуралнăранпа 125 çул çитнĕ май йĕркеленĕ. Унта асăннă институтра ĕçлекен литература, фольклор тĕпчевçисем - паллă профессорсемпе наука кандидачĕсем - В.Г.Родионов, И.Ю.Кириллова, В.А.Ендеров, О.Н.Терентьева, Н.Г.Ильина, Е.В.Федотова тата ыт.те хутшăнчĕç. Сумлă делегацие ертсе пыраканĕ те Нỹшкассинченех иккен - Геннадий Алексеевич Николаев. Вăл - истори наукисен кандидачĕ, хальхи вăхăтра институт директорĕн ăслăлăх енĕпе ĕçлекен çумĕ.
Тухса калаçакансем Тăхти пултарулăхне тĕрлĕ енлĕн тишкерчĕç, унăн хайлавĕсене пысăка хурса хакларĕç. Писателĕн çырас ăсталăхĕ пысăккине, вăл çав тери хăйне евĕр, никамăнни пек те маррине палăртрĕç. "Колчак", "Элихун" поэмисене, "Шерхулла", "Ярмуш", "Ыт-тĕкел", "Помидор" калавĕсене уйрăмах ырă енчен асăнчĕç. Элпуçĕнчи шкулта вĕренекенсем Тăхти çырнă хайлавсен сыпăкĕсене хавхаланса вуларĕç. Юбилей тĕлне шкул музейĕнче тата вулавăшра ятлă-сумлă ентеше халалланă ятарлă куравсем ĕçлерĕç.
П.НИКИФОРОВ