05 сентября 2014 г.
Кăçал юпа уйăхĕн 9-11-мĕшĕсенче Шупашкарта пĕтĕм халăхсем хушшинчи "Раççей - спорт патшалăхĕ" форум иртет. Çакăн пирки Раççей Президенчĕ Владимир Владимирович Путин йышăну кăларнă. "Раççей - спорт патшалăхĕ" форума йĕркелесе ирттерсе ярассипе ĕçлекенсен черетлĕ ларăвĕ пулнă.
Транспорт тата çул-йĕр хуçалăхĕн министрĕ В.Филиппов асăннă мероприяти вăхăтĕнче транспортпа мĕнле тивĕçтересси пирки пĕлтернĕ. Владимир Иванович каланă тăрăх Мускавран Шупашкара хушма рейссем уçĕç. Шупашкара чугун çулпа - 800 яхăн çын, Канашри чукун çул вокзалĕнче 850 çынна кĕтсе илмелле. Çывăхри регионсенчен автотранспортпа 14 делегаци (200 çын) çитĕ тата ытти те.
Республика Пуçлăхĕ хулари автотранспорт хăтлă пулмалли пирки асăннă. Ларурисем сувенир продукцийĕсене кăларасси пирки те калаçнă. Экономика аталанăвĕ, промышленноç тата суту-илỹ министрĕ Владимир Аврелькин регион символĕпе туса кăларнă парне - комплектсемпе паллаштарнă, чăваш тумĕ, форум логотипĕпе усă курса хатĕрлекен спорт костюмĕ пирки сăмах хускатнă.
Олимпиада чемпионки Е.Николаева республика пысăк мероприятисем ирттерессипе чылай опыт пухни, форум тивĕçлĕ шайра иртесси пирки каланă.
Вĕрентỹпе çамрăксен политикин министрĕ В.Иванов волонтерсен ушкăнĕсен ĕçне йĕркелесси çинчен сăмах хускатнă. Вĕсен списокне тăвас енĕпе ĕç кĕçех вĕçленет иккен. Пурĕ 495 волонтер пулăшĕ. Вĕсенчен ытларахăшĕ Хусанта иртнĕ спорт форумĕн, Сочири Олимп вăййисен ĕç-хĕлне хутшăннă. Физкультурăпа спорт министерстви волонтерсене вĕрентмелли программа хатĕрлет.
В.ВАСИЛЬЕВ.