05 сентября 2014 г.
Раççей Президенчĕ Владимир Путин ГТО нормисене памалли системăна тепĕр хут йĕркелесси пирки Указ кăларнă. "Ĕçлеме тата хỹтĕлеме хатĕр" текен программăна пурнăçа кĕртме чĕнсе каланă вăл çапла майпа. ГТО нормисене, ултă çулхи ачасенчен пуçласа, пурĕ 11 ỹсĕмри çынсем пама пултараççĕ.
Пирĕн республикăри организацисемпе предприятисен коллективĕсем сывă пурнăç йĕркине ырлаççĕ. Ку енĕпе врачсем ырă тĕслĕх кăтартнине палăртмалла. Шупашкар хулинчи тĕп больницăра вăй хуракансем çулсем иртнĕ май манăçнă йĕркене - ирсерен зарядка тăвассине пуçарнă тепĕр хут. "Эпир кунĕпе ĕçлеме хавхаланатпăр çапла майпа. Пациентсене ырă тĕслĕх кăтартатпăр, вĕсем пурнăç тăршшĕпех активлă хусканура пулччăр тесе тимлетпĕр", - теççĕ сывату учрежденийĕн сотрудникĕсем. Улатăрти тĕп больница коллективĕ физкультура пỹлĕмĕнче Сывлăх кунĕсем ирттерет. Çавăн пекех пирĕн районти врачсем те физкультурăпа, спортпа туслă. Шупашкарта "Раççей - спорт патшалăхĕ" форум ирттерессине пĕлеççĕ вĕсем. Çак пысăк мероприяти пулассине Тăвайри вăтам шкулта вĕрентекенсем те ырласа йышăннă. Вĕсем "Аль" спорткомплексра Сывлăх кунĕ ирттернĕ август уйăхĕн юлашки кунĕнче. Вĕрентекенсем тĕрлĕ хусканусем тунă, бассейнра ишнĕ тата ытти те. "Раççей - спорт патшалăхĕ" форум Чăваш Ене пысăк сум кỹрессе ăнланаççĕ çапла республикăра пурăнакансем.
А.КИРИЛЛОВ, "Аль" спорткомплекс директорĕ.