05 сентября 2014 г.
Çу кунĕсенче Енĕш Нăрвашри историпе асăну музейĕнче кам кăна пулмарĕ пулĕ? Çуллахи каникул вăхăтĕнче шкулсем çумĕнче лагерьсем ĕçленĕ май, Элпуçĕнчи, Тăрмăшри тата ытти ялсенчи вĕренекенсем музея килсе курма кăмăл турĕç.
Отпуска е канма хăйсен тăванĕсем патне çĕр-шывăн тĕрлĕ кĕтесĕсенчен килнĕ хăнасем те кунта çитсе курма васкарĕç. Вĕсен шутĕнче - Майрасловсен Мускав облаçĕнчи тата Шупашкарти тăванĕсем. Николай Яковлевич Яковлев (Мускав) Тăрмăшра çуралса ỹснĕ, отставкăри инженер-майор. Мăшăрĕ Галина Васильевна - Çĕнçырмаран (хĕр чухнехи хушамачĕ Васильева). Тата вĕсен ывăлĕ Александр. Педагогика ĕçĕн ветеранĕ Мая Дмитриевна Арестова та пĕрле вĕреннĕ юлташĕсемпе пулчĕ. 60 çул каялла, 1954 çулта, Енĕш Нăрвашра вăтам пĕлỹ илни çинчен аттестат илнĕ вĕсем. Çав вăхăтпа çыхăннă сăн ỹкерчĕксене пăхса, статьясене вуласа шкул çулĕсене аса илчĕç.
Çавăн пекех музейре чăвашсен паллă эстрада юрăçисен Михаил Федоровпа Толстовсен тăванĕсем - Карелинчен, Ульяновск, Тюмень облаçĕсенчен, Çĕнĕ Шупашкар хулинчен, Васильевсен çывăх тăванĕсем - Санкт-Петербургран, Екатеринбургран, пĕр ратнери Егоровсемпе Меркурьевсен - Шупашкартан; Егоровсен, Артемьевсен, Пускаевсен тăванĕсем Мускав облаçĕнчен, Шупашкартан пулчĕç.
Çирĕм çул каялла вĕренсе пĕтернисем тăван шкула пуçтарăнчĕç, вĕсем те хăйсем пĕлỹ пухнă самантсемпе паллашрĕç. Çавăн пекех музейре Шупашкарти пенсионерсен совечĕн членĕсем, вăрçăпа ĕç, çар ветеранĕсем те çитсе курма кăмăл турĕç. Районти ялсенчи ветерансен канашĕсен председателĕсем музейре тĕл пулу ирттерчĕç.
Унсăр пуçне "Чăваш Ен" наци телевидени ĕçченĕсем "Ылтăн çỹпçе" передача валли ятарлă кăларăм хатĕрлерĕç. "Чăваш хĕрарăмĕ" хаçат корреспонденчĕ те музей ĕçĕ-хĕлĕпе паллашрĕ. "Хресчен сасси" хаçат сотрудникĕ Валентина Петрова вăрçă вăхăтĕнчи виç кĕтеслĕ çырусемпе интересленчĕ. Район прокурорĕ О.Ястребова канашлăва килнĕ май, нăрвашсен "ылтăн çỹпçинчи" пуян экспоначĕсемпе паллашрĕ. Кунта "На страже закона" стенд йĕркеленĕ йĕрке хуралĕнче ĕçлекенсен ячĕпе.
Канашран, Вăрмар тата ытти районĕсенчен те Нăрваша çитсе курма вăхăт тупрĕç. Августăн юлашки кунĕсенче Шупашкарти 5-мĕш гимназире вĕренекенсем музейпа киленчĕç, ялти паллă вырăнсене çитсе курчĕç.
В.ПЕТРОВ, музей заведующийĕ.
Сăн ỹкерчĕкре: Яковлевсен çемйи музейпе паллашать.