05 сентября 2014 г.
Раççей Федерацийĕн Президенчĕ Владимир Владимирович Путин Раççее хирĕç санкцисем йышăннă патшалăхсенчен ял хуçалăх продукцийĕсем, апат-çимĕç тата ытти хăш-пĕр тавар кỹрсе килессине чарса лартасси пирки пĕлтерчĕ. Çакна Чăваш Республикинче пурăнакансенчен ытларахăшĕ ырласа йышăнать.
-Раççей Президенчĕн "Раççей Федерацийĕн хăрушсăрлăхне тивĕçтерес тĕлĕшпе экономикăн уйрăм ятарлă мерине йышăнасси çинчен" указне эпĕ ырлатăп. Ял хуçалăх ĕçченĕсемшĕн - пысăк тĕрев, пулăшу ку. Мĕншĕн тесен пирĕн выльăх-чĕрлĕх пăхакансемпе тыр-пул çитĕнтерекенсем çĕр-шыв тулашĕнчи ĕçтешĕсенчен пĕрре те кая мар вăй хураççĕ. Хамăр халăха тĕрлĕ апат-çимĕçпе тивĕçтерессинче нимĕнле йывăрлăх та пулмалла мар. Мĕн çитĕнтернине тăкаксăр пухса кĕртмелле, вырнаçтарма тăрăшмалла. Пĕтĕмпех хамăр çаврăнăçулăхран килет халь.
Раççей Президенчĕ çапла тĕрĕс, хăюллă утăм турĕ. Вăл хăйĕн йышăнăвĕсене пурнăçа кĕртет. Çакна пурнăçри нумай тĕслĕх çирĕплетет.
А.ЕФИМОВ. Тăвай ялĕ.