02 сентября 2014 г.
Енĕш Нăрвашри музейре интереслĕ тĕл пулу иртнĕ. Ураскассинчи Юрий Петровпа (халĕ вăл Шупашкар районĕнчи Атлашево ялĕнче пурăнать) тата Геннадий Салмина (Тăвайри тĕп больницăра водительте ĕçлет) 1970 çулта Германире çар тивĕçне пĕрле пурнăçлама тивнĕ. Çав çулхине эпĕ те шăпах Нейстрелиц хулинчи танк полкĕнче службăра тăнă. Çавăн чухне мана Юрий Петровпа темиçе хутчен тĕл пулса калаçма тỹр килнĕ. Г.Салмин юнашар полкра пулнă-мĕн. Аслă Отечествăллă вăрçă çулĕсенче шăпах кунти танк полкĕн командирĕ чăваш каччи, Георгий Максимов полковник пулнă. Çав полк Вологда хулинче йĕркеленнĕ. Ултă орденлă танк полкĕ йывăр çапăçусенче тăшмана парăнтарса Германие çĕнтерỹпе çитнĕ.
1970 çулхи май уйăхĕнче отставкăри генерал-майор Г.Максимов хăйĕн полкне çитсе курма кăмăл тунă. Çавăн чухне вăл чăваш ачисемпе тĕл пулнă, кашнинпех алă тытнă, çар тивлечĕ пирки калаçнă. Çак тĕл пулу шăп та лăп 44 çул каялла пулнă.
Чăваш телевиденийĕ хăйĕн пĕр передачинче Енĕш Нăрвашри музей пирки калаçу пуçарнă, унта эпĕ те хамăр ĕç-хĕлпе паллаштарнăччĕ. Çав кăларăма Юрий Петров та курнă, хăйпе пĕрле салтак пăттине çинĕ ентешне палласа илнĕ. Çавăнпа та службăра пĕр хулара пулнă Г.Салминпа музея килсе çитнĕ. Салтак вăхăчĕсене аса илнĕ май, танк полкĕн командирĕ Г.Максимов шăп та лăп Шупашкар районĕнчи Атлашевăра пурăннине пĕлтĕм. Халĕ вăл çутă тĕнчерен уйрăлса кайнă. Унăн сăнĕ Кỹкеçре çар комиссариатĕнчи Хисеп хăми çинчи паллă çынсем хушшинче иккен.
Çу кунĕсенче Енĕш Нăрвашри музейре пулнă ушкăнсем унăн ĕçне пысăк хак парса тав сăмахĕсем çырса хăварнă. Нăрвашсен аваллăх "çỹпçийĕ" хулари сумлă музейсенчен пĕртте кая мар тенĕ, татах та килсе çỹреме кăмăл туни çинчен пĕлтернĕ.
В.ПЕТРОВ,музей заведующийĕ.