02 сентября 2014 г.
Халăхсем хушшинчи "Раççей - спорт патшалăхĕ" форум Шупашкарта октябрĕн 9-11-мĕшĕсенче иртет.
-Тỹрех калатăп, çавнашкал пысăк мероприятие Чăваш Енре ирттерме ăнсăртран суйласа илмен Раççей Президенчĕ. Республика юлашки çулсенче физкультурăпа спорта аталантарассишĕн чылай ĕçленине шута илнĕ вăл. Кунта физкультурăпа, спортпа туслашмалли лайăх условисем туса парассишĕн тимлеççĕ тата ытти те. Пысăк спорт ăмăртăвĕсемпе турнирсем те тăтăшах иртеççĕ Чăваш Енре, - тет Раççей Федерацийĕн министрĕ Виталий Мутко.
-Хамăр патăрта халăхсем хушшинчи "Раççей - спорт патшалăхĕ" форума йышăнни пысăк чыс тата ответлăх. Маларах тĕрлĕ ăмăртусене йĕркелесе опыт пулни пире асăннă мероприятие çỹллĕ шайра ирттерме май парĕ, - хăйĕн шухăшне пĕлтернĕ Республика Пуçлăхĕ Михаил Игнатьев.
Çавна май халь чăваш çĕр-шывĕнче тĕрлĕ тупăшусем иртеççĕ. Совет Союзĕн икĕ хут Геройне, СССР летчик-космонавтне А.Г.Николаева асăнса çăмăл атлетсен чупăвĕ пулать сентябрь уйăхĕнче.
"Советская Чувашия" хаçат редакцийĕ ак, "Эпĕ сывлăхлă - çĕр-шыв вăйлă" ятлă сăн ỹкерчĕксен конкурсне йĕркелет. Ирхи зарядка, стадионри тренировка, çемьепех йĕлтĕрпе ярăнни, хăвăр ĕçлекен предприяти коллективĕпе "Хаваслă стартсем" вăййа хутшăнни тата ытти темăсем те пур сăн ỹкерчĕксем валли. Чи кирли - фотоаппаратпа ỹкерсе илмелле кăна. Сăн ỹкерчĕксене октябрĕн пĕрремĕшĕччен çак электронлă адреспа ямалла: sch@chuvashia.ru.
428019, г.Чебоксары, пр. И.Яковлева, 13 - адреспа почта урлă яма пултаратăр. "Здоровый я - сильная страна" ("Эпĕ сывлăхлă - çĕр-шыв вăйлă") тесе çырса хурăр конверт çине.
"Грани" хаçат редакцийĕ вара "Манăн пурнăçри спорт" хайлавсен конкурсĕ йĕркеленĕ. "Личный рост", "Спортивная летопись" номинацисенче хаклаççĕ çырнă ĕçĕсене. Лайăх статьясене "Грани" хаçатра пичетлеççĕ. grani@cap.ru электронлă адреспа тата почта урлă (г.Новочебоксарск, ул. Советская, д. 14 "а") яма юрать хăвăр статьясене. Конверт çине "Спорт в моей жизни" ("Манăн пурнăçри спорт") тесе çырмалла.
"Ял ĕçченĕ" хаçат редакцийĕ те спорт форумне халалласа сентябрь уйăхĕнче сăн ỹкерчĕксен "Сывă пурнăç - ырă пурнăç" конкурсне ирттерет. Районти спорт пурнăçĕпе çыхăннă ăнăçлă ĕçсене хаçатра пичетлеççĕ. Шкулта вĕренекенсем те, аслăрах ỹсĕмрисем те хутшăнма пултараççĕ унта. Çĕнтерỹçĕсене Хисеп хучĕсемпе тата парнесемпе чыслаççĕ.
Сăн ỹкерчĕксене электронлă адреспа (yantik_ press@cap.ru), почта урлă ярса е кĕрсе пама пултаратăр.
В.ВАСИЛЬЕВ.