22 августа 2014 г.
Хĕрлĕ Чутай районĕнчи Питĕркасси ял тăрăхĕн стадионĕнче мини-футбол турнирĕ иртрĕ. Ăна Хĕрлĕ Чутайри вăтам шкулта физкультура учителĕнче ĕçленĕ, анчах пурнăçран вăхăтсăр уйрăлса кайнă В.В.Селенина халалланă.
Астăвăм турнирне Çĕнĕ Пуянкасси ял тăрăхĕн футболисчĕсене те чĕннĕ. 16-17 çулхи футболистсен ушкăнĕнче Питĕркассинчи вăтам шкул футболисчĕсем çĕнтернĕ. Пуянкассисемпе Антарти вăтам шкул команди 2-3-мĕш вырăнсем йышăннă.
50 çултан аслă мар футболистсен ушкăнĕнче куçса çỹрекен кубока турнир йĕркелỹçисем алăран яман. Пирĕн ветерансем - 2-мĕш вырăн.
50 çултан аслă футболистсем хушшинче пьедесталăн çỹлти картлашкине пуянкассисемпе стадион хуçисем йышăнма тивĕçнĕ.
Мала тухнисене Хĕрлĕ Чутай район администрацийĕн грамотисем, кубоксемпе медальсем парса хавхалантарнă, спортсменсене вĕри апат çитернĕ.
Çак туслă çыхăну малашне те çирĕпленсех пырасса шанатпăр.
М.ВАСИЛЬЕВ.