19 августа 2014 г.
Район администрацийĕнчи тунти кунхи ларăва ял тăрăхĕсен пуçлăхĕсене те чĕннĕ. Калаçăва район администрацийĕн пуçлăхĕ В.Ванерке йĕркелесе пынă.
Ку эрнери мероприятисем: августăн 19-мĕшĕнче район администрацийĕн пĕчĕк залĕнче право йĕркине пăснин профилактикин ыйтăвĕпе канашлу иртет, тăхăр сехетре пуçланать. Çав кунах "Хутшăну искусстви. Медицина сестри - пациента пулăшакан" ятлă çавра сĕтел тата семинар-тренинг пулать Тăвайри больницăра. Юн кун ирхине района ЧР физкультурăпа спорт тата туризм министрĕн пĕрремĕш çумĕ А.Яковлев ертсе пыракан ушкăн килет, вăл пĕрлехи информаци кунне хутшăнать.
Информаци кунĕн тĕп ыйтăвĕсем:
1.Экономикăпа социаллă пурнăç аталанăвĕ тата Чăваш Республикин республика бюджетне 2014 çулхи I çур çулта пурнăçланин итогĕсем çинчен. 2.Чăваш Республикинчи вĕренỹ заведенийĕсене çĕнĕ вĕренỹ çулне хатĕрлесси çинчен.
13 сехетре граждансене харпăр хăй ыйтăвĕсемпе йышăнаççĕ.
Строительство, çул-йĕр тата пурăнмалли çурт-йĕрпе коммуналлă хуçалăх пайĕн начальникĕ А.Алексеев пĕлтернĕ тăрăх хутмалли сезона хатĕрленесси начар мар пулса пырать. Хваттерсене харпăр хăй газпа ăшăтмалла тăвас ĕçе хăйсем хутшăнма хирĕçлекенсемпе ăнлантару ĕçне вăйлатмаллине палăртрĕ вăл.
Кĕçнерни кун ЧР вĕрентỹ министерствин представителĕпе пĕрле Тăвайри шкулчченхи учреждение тунă çĕрте ĕçлĕ планерка иртмелле. Юсавпа техника предприятийĕ территорийĕнче çĕкленекен 12 хваттерлĕ объектра виççĕмĕш хута хăпартса пĕтереççĕ, ĕç малалла пырать кунта. Вăтаялĕнчи ФАП-ри ĕçсене хăвăртлатмалла.
Район администрацийĕн пуçлăхĕн пĕрремĕш çумĕ - АПК аталанăвĕпе экологи пайĕн начальникĕ В.Чайкин, вĕрентỹ пайĕн ертỹçи О.Ломоносов, социаллă аталану тата архив ĕçĕсен пайĕн начальникĕ Н.Чайкина, "Аль" спорткомплекс директорĕ А.Кириллов, полици уйрăмĕн ертỹçи В.Обаськин, надзор ĕçĕсен пайĕн инспекторĕ А.Фролов, Тăвайри больницăри тĕп врачăн çумĕ Т.Игнатьева, налук службин районсем хушшинчи инспекцийĕн специалисчĕ В.Алексеева тата ыттисем тухса калаçнă.
Район администрацийĕн пуçлăхĕ В.Ванерке ответлă работниксене ку эрнери тĕллевсене пурнăçа кĕртессипе ытларах тимлеме хушнă.
Г.ЕГОРОВА