19 августа 2014 г.
Шупашкар хулин кунĕнче Республика Пуçлăхĕ Михаил Игнатьев "Творчествăлла бульвар" арт-проектпа паллашнă. Гагарин ячĕллĕ урамран пуçласа Хĕрлĕ лапама çити тăсăлнă бульвар, унта пурĕ 545 артистпа творчествăлла коллектив хăйсен пултарулăхне кăтартнă.
Унтан Республика Пуçлăхĕ Хĕрлĕ лапамри "Шупашкар - сан çитĕнĕвỹсен хули" мероприятие хутшăннă. Шупашкар хулипе Чăваш Республикин Хисеплĕ гражданинĕ, авиацин генерал-лейтенанчĕ, Раççей Геройĕ Николай Гаврилов мăшăрĕпе, Чăваш митрополичĕ Владыка Варнава, ĕç тăвакан органсен, Шупашкар хулин ертỹçисем, Чăваш Патшалăх Канашĕн тата Шупашкар хулин Пухăвĕн депутачĕсем, политика партийĕсен тата обществăлла организацисен представителĕсем, "Стрижи" ушкăн летчикĕсем, Намиби Республикин делегацийĕ тата ыттисем кăмăл тунă уяв илемĕпе киленме.
Михаил Игнатьев хулара пурăнакансене тата хăнасене Шупашкар кунĕпе саламланă, ĕçре ăнăçусем суннă.
-Шупашкар - питĕ илемлĕ хула. Тỹперен те, космосран та пăхса ытармалла мар ăна,-тенĕ авиацин генерал-лейтенанчĕ Н.Гаврилов.
Чăваш митрополичĕ Владыка Варнава шупашкарсене мир, телей, юрату суннă.
Шупашкар 545 çул тултарнине халалланă уяв Лариса Долина юрăç концерчĕпе тата фейерверкпа вĕçленнĕ.
И.ПАВЛОВ.