19 августа 2014 г.
Районти агропромышленноç комплексĕнче инвестици проекчĕсене пурнăçа кĕртессипе малалла ĕçлеççĕ. Акă, çапла, "Акконд-агро фирма" хупă акционерлă обществăра сĕт цехне çĕнетсе лайăхлатмалли ĕçсен пысăкрах пайне пурнăçланă. Унăн сметăпа пăхнă хакĕ - 30,2 млн. тенкĕ. Çакна валли кредит укçи-тенкипе те усă кураççĕ, 24 млн. тенкĕлĕх вăрăм сроклă инвестици кредичĕ йĕркеленĕ.
С.Р.Илларионов хресчен-фермер хуçалăхĕнче 200 пуçлăх пăру вити тăвас ĕçе ку вăхăт тĕлне 19,7 млн. тенкĕ инвестици хывнă, 70 процентне тунă, пĕтĕмпе вара 28,2 млн. тенкĕлĕх строительство ĕçĕсем пурнăçламалла.
С.В.Хумышев хресчен-фермер хуçалăхĕнчи 120 ĕне усрамалăх витене çĕнетсе лайăхлатма паянхи куна 2,7 млн. тенкĕлĕх укçа хывнă. Смета хакĕ - 6 млн. тенкĕлĕх. Вăрăм сроклă инвестици кредичĕсене 2,1 млн. тенкĕлĕх явăçтарнă.
С.Н.Михайлов фермер çĕрулми хранилищине çĕнетсе тума ку вăхăт тĕлне 1,3 млн. тенкĕ инвестици янă, палăртнă ĕçсен 65 процентне пурнăçа кĕртнĕ. Çапла вара кунта та малалла ĕçлеççĕ-ха. Хранилищĕн пĕр енчи стени çумне тăпра çỹллĕлетсе купалама та ĕлкĕрнĕ.
О.С.Восторгинăн хресчен-фермер хуçалăхĕнче "Ялти усадьба" турист базине 53,2 млн. тенкĕ хывнă, палăртнин 72 процентне тунă.
Кăçалах çак инвестици проекчĕсене пурнăçлама тытăнма палăртнă.
"Акконд-агро фирма" хупă акционерлă обществăра - смета хакĕпе 38 млн. тенкĕлĕх 440 пуçлăх пăру вити;
В.Г.Грачев хресчен-фермер хуçалăхĕнче - смета хакĕпе 15 млн. тенкĕлĕх 200 пуçлăх пăру вити.
Чăваш Ен Пуçлăхĕ Михаил Игнатьев 2014 çулхи августăн 11-мĕшĕнчи пресс-конференцире палăртнăччĕ ĕнтĕ, агропромышленноç комплексĕн организацийĕсене, хресчен-фермер хуçалăхĕсене тата харпăр хăйĕн хушма хуçалăхĕсене патшалăх пулăшăвĕ панин калăпăшĕсем сыхланса юлнă кăна мар, 2 млрд. та 390 млн. тенкĕне çити ỹснĕ те. Патшалăх пулăшăвне кăçал Тăвай районĕнчи фермерсем те аван туйса илчĕç. "Ĕç пуçлакан фермер" конкурсра А.В.Павлов, Г.В.Гурьев, Н.В.Ильин хресчен-фермер хуçалăхĕсем çĕнтерỹçĕсем пулса тăчĕç. Çак шутпа тивĕçнĕ укçа-тенкĕне вĕсем ял хуçалăх техники, мăйракаллă шултра выльăхсем туянма тата выльăх-чĕрлĕх витине çĕнетме янă. Вĕсемсĕр пуçне ХФХ пуçлăхĕ С.Р.Илларионов çемье фермине аталантармашкăн 5 млн. тенкĕ гранд çĕнсе илнĕ.
Л.БЕРИЛЛО, райадминистрацин экономикăпа пурлăх хутшăнăвĕсен пайĕн начальникĕ.